Shah shet u paidbah ka East Jaintia Hills ha u dek

Syllad | The Rising MeghalayaMarch 1, 2022

U Paidbah ka East Jaintia Hills District ula shah shet ha u dek halor ka jingplie paidbah iaka Civil Hospital, Khliehriat.

Kane kala paw tynkreiñ hadien ka jingwan jurip ka Hynniewtrep Integrated Territorial Organization (HITO) haka sngi ba Ar ia kane ka hospital kaba la kyntiew kyrdan na ka CHC sha ka Civil Hospital Khliehriat, phewse ka dei tang ka jingkylliang signboard.

Ka jingplie paidbah jong ka Civil Hospital Khliehriat ka dei tang ka ka jingpynkiew kyrdan jong ka signboard namar kane ka hospital ka don bun bah ki jingduna kiba kdew shai ba ka dei tang ka pynbeit paidbah namar ba la jan eleshon MLA.

Ka seng HITO kala lap ba katei ka Hospital kam pat don ka X Ray machine ne ka USG machine kiba long ki kor kiba donkam ban lap thikna ia ka jingpang jingshitom.

Kila lap ruh ba wat ka Laboratory ruh kam long kaba biang bad ka jaka buh snam ne ka Blood Storage kam long kaba biang.

Ka HITO ka kdew ba ka Emergency room kam long kaba biang katkum ka juh mynta.

Ka HITO ka la ong ba ka Operation Theatre kan dang donkam shibun khnang ban lah ai jingshakri ia ki nongpang bad katei ka Hospital kam don Anesthesia Doctor.

Ha ka jingshisha ka Hospital ka dei ban don 100 jingthiah hynrei wat hadien ka jingplie paidbah da ka jingpyllut pisa paidbah ka don ka tang 50 jingthiah.

Ka HITO ki la ong ba ka oxygen line kam pat biang bad kam biang ka um bam um dih.

Ki nongialam HITO kiba kynthup ia u president Deibormi Rymbai bad u General Secretary Sokini Dkhar ki la kdew ia kine ki jingduna ha u District Health & Medical Officer (DM&HO).

Ha ka 14/02/2022 la pynkiew kyrdan ia ka na CHC sha ka Civil Hospital da u Chief minister jong ka Meghalaya tang ba ha ka jinglap jong ka HITO kam iahap ba ka dei ka hospital namar ki jingduna ki dang bun bha .