Shah shoh pynmynsaw ki nongialam shnong ka Maskut, shah pyniap ar ha East bad West Jaiñtia

Syllad | The Rising MeghalayaMay 14, 2020

Ki ar ngut ki nongialam shnong jong ka Maskut, ka shnong kaba don harud ka them jong Sung Valley, kila shah thombor bad shah shoh pynmynsaw ha ki briew kiba ki ithuh haka sngi Balang.

Kine ki nongialam shnong ka Maskut kiba shah shoh pynmynsaw ki dei u Waheh Shnong u Kyrsiew Kharbithai bad u Generous Tariang Secretary uba peit iaka skhim bylla 100 sngi.

Ka khubor kaba ïohlum ka iathuh ba haka 12 tarik kine ki ar ngut ki nongialam shnong Maskut kila shah byrngem byrsit ha ki briew kiba ki ithuh bad ki dei ki mar jan shnong kiba ia rep ia riang sha Sung Valley.

Kine ki nongialam shnong ka Maskut kila dep mudui ejahar haka 12 tarik une u bnai ha Ummulong Beat House.

Hynnin ka sngi Balang pat haka por 4 baje nohphaisngi haka jaka kaba la tip kum ka Umshohthad, kaba don hajan shnong Maskut kine ki nongialam shnong ka Maskut kila shah shoh pynmynsaw ha kine briew kiba wan da ka kynhun.

La ujor biang sa kawei ka ejahar halor kane ka jingjia, ong u Dolloi ka Elaka Maskut u Ma Phrangki Rynjah.

Ia kine ki nongialam shnong la kit sha Ummulong CHC bad hadien la pynkynriah sha Jowai Civil Hospital Ialong ba kin ioh ka jingsumar kaba paka.

Ki Pulit jong ka Jowai Police Station kila shimkhia ban tohkit halor kane ka jingjia.

Ha kawei pat ka jingjia kaba la jia haka 10 tarik une u bnai ar ngut ki briew kila shah pyniap ha ki ar jaka.

U Hamjngai Sutnga ula mudui da ka ejahar haka 10 tarik une u bnai ba haka por 2:30 Pm u Iohlang Sutnga katba u dang wan naka jaka rep ne ka pharm, ki briew kiba ym ithuh bad kiba la kynnoh ba ialam da Dawemankmen Sukhlaiñ kila thombor bad pyniap ia u Iohlang ha Krenshrieh kaba hap ha Khaidong village, East Jaintia Hills.

Uwei pat briew uba la tip kum u Hamsynta Swer (27 snem) ula shah pyniap ha Sohsale Nongkyllep hajan ka shnong Pdeiniadaw, West Jaintia Hills. Halor kane u Hynmen jong u Iai-ap Swer ula mudui da ka ejahar ha ki pulit haka juh ka miet kaba jia kane ka jingjia.