Shah shoh san ngut ki Pnar kynthup u khynnah ba dang 16 snem ha khappud Assam Meghalaya

Syllad | The Rising MeghalayaAugust 13, 2022

Ki paidbah ba shong ba sah ha khappud Assam Meghalaya kaba hap ha Block I kila kynnoh ba ki pulit Assam kila shoh dusmon da kaba sympat da ki lathi bad tied da ki tdong suloi iaki san ngut ki Pnar kiba kynthup ïa uwei u khynnah ba dang 16 snem na ka shnong Mowjem.

Kane ka jingjia kala jia haka sngi Palei.

U Secretary Shnong Mowjem u Ma Nilanki Sten la ïathuh ba san ngut ki nongshong shnong ki la shah shoh ha ki pulit Assam kiba na Jrikyndeng haka jaka bala tip kyrteng kum Inghilangso haka por bad kitei ki san ngut ki dang wan phai na ka jingleit ïit ïa uwei u nongshong shnong uba ym shym la poi ïing na ka jingleit khawai dohkha na ka Wah Mynriang.

Kitei ki san ki long u Walangki Sungoh 16 snem ka rta bad saw ngut kiwei pat ki rangbah briew kiba la tip kyrteng kum u Augustin Shylla, Kordon Sungoh, Binelson Raksaw bad Manki Sungoh.

Na ka liang jong u Kordon Sungoh ula ïathuh bad ula shah shoh biang ha ki pulit Assam hapoh thanad Jrikyndeng hadien ba ula kylli na ki pulit balei ba ki shoh ki dat ïa u khlem daw eiei.

Ki nongïalam shnong jong ka Mowjem kiba kynthup ïa u Waheh shnong, u Secretary Shnong nalor kiwei kiwei de ki la leit mar mar sha katei ka thanad ban ïakren pyllait ïa kitei ki briew.

U Ma Nilanki Sten haka jingsynran jong ka President ka STIEH ka Kong Purity Phawa, u Joannes Lamare, u Secretary Labang Nongphyllut People Council (LNPC) u ma MM. Thaiang nalor kiwei de ki la leit ïakynduh ïa u Deputy Commissioner jong ka West Jaintia Hills u Ma Garod LSN Dykes haka sngi Thohdieng ban tuklar kane ka jingjia.

Na ka liang jong u DC ula kular ban shimkhia ïa kane ka kam da kaba ïakren bad u DC jong ka West Karbi Anglong District, Assam.