Shah thang im 3 ngut ha East Garo Hills, lap ia ki metiap na ka jaka khlaw

Syllad | The Rising MeghalayaApril 18, 2024

Ki bor pulit ha ka step 17 tarik mynta u bnai ki la lap ia laitylli ki metiap ba la ingkhong jong ki laingut ki briew kiba dei na Assam napoh kawei ka khlaw ba rben ha ki bynta jong ka East Garo Hills District.

Na ka liang ki pulit ki la suba jur ba ka lah ban dei ka jingjia ia pynhiar kput hapdeng ki kynhun runar tuh kali bad kynhun nongtuh masi. Ia ki arngut napdeng kine kiba la shah pyniap la tip kyrteng kum u (L) Zahidul Islam bad u (L) Jamor Ali.

Na ka liang u Superintendent of Police (SP) ka EGH u Bah SA Rynjah u la pyntip ba (L) Zahidul Islam la ong ba u dei uba donkti ha ki jingjia shah tuh kali ha Dudhnoi bad Krishnai, bad kawei ka case ka dang sahteng pyrshah ia u hapoh Krishnai PS. Kumjuh u (L) Jamor Ali la ong ba u dei uba donkti ha ki kam tuh masi ha ki thain kiba hap hapoh Matia PS, Assam.

Ha ka 16 tarik mynta u bnai ki pulit ki la ioh jingtip na kiba haiing hasem jong uwei na kine u lanot, u Jamor Ali 35 snem rta ba ma u ha ryngkat u nongniah kali jong u, u (L) Noor Ahmed bad u (L) Zahidul Islam 25 snem rta ki la mih na la iing ha ka janmiet jong ka 15 tarik mynta u bnai ban wan sha Meghalaya namar ki la don kiba la wer ia ki halor ki katto katne ki kam sha Meghalaya.

Ha ka step jong ka 16 tarik mynta u bnai ha ka por kumba  6:30 kiba haiing hasem ki la ioh pdiang ia ka phone na u (L) Jamor Ali ba ki dang ia bam jingbam step ha kawei ka jaka khlaw ha ki bynta ka Garo Hills. Hynrei, hadien kane la shem  ba ki mobile phone jong ki, ki la switch off bad kiba haiing hasem kim shym la ioh shuh ban iakren bad ki.

Na ka liang u SP u la ong ba ia ka kali kaba jah rngai la lapdien napoh ka jaka khlaw kaba rben hajan ka shnong kaba pyniasoh ia ka shnong Rogu Alda kaba hap hapoh Rongjeng PS, East Garo Hills. U la ong ruh ba ki pulit ki la leit sha katei ka jaka ba la jia bad lapdein ia ka kali kaba jah rngai kaba la shah thang hapoh khlaw.

Hadien ba la pynlong ia ka jingwad la lapdien ia ka thliew kaba dang shu tih thymmai bad ia kaba la tap da ka khyndew kaba dang thymmai hajan ka kali. U SP u la ong ruh ba na ka liang ka kynhun Forensic Team bad Crime Scene Unit na ka tnat pulit ka Jylla ruh ki la wan poi ha kane ka jaka na ka bynta ka jingtohkit.

Hadien ha ka jingiadon lang u Executive Magistrate la khot noh ia kane ka khyndew na kane ka thliew ha kaba la lapdien ia ki laitylli ki metiap kiba la ingkhong. Hadien na ka liang ki bor Pulit kila register case ia kane ka jingjia hapoh ka Rongjeng PS.