Shah thang ka kali sorkar bad shah dung uwei ha ki runar ha West Jaintia Hills

Syllad | The Rising MeghalayaJanuary 12, 2021

Uwei u briew ula mynsaw jur hadien ba ula shah dung ha ki runar kiba ym pat lah satia ban ithuh ba kidei kiei bad thang ruh ka kali sorkar haka miet Sngi Nyngkong haka shnong Biar, West Jaintia Hills kaba hap ha Raliang Polie Out Post.

Une u briew uba la mynsaw jur u dei uba la tip kum u Kenny Son Papang. U dei ruh uba niah ia kane ka kali.

Kane ka kali kaba shah thang ka dei ka Tata Winger, kaba don u register number ML 04C 4806 kaba dei ka kali paidbah- Rural Public Transport jong ka sorkar Jylla.

Ka khubor kaba iohlum kane ka jingjia kala jia haka por kumba 11 PM bad ym tip na kaei ka daw kitei ki runar kila thang iaka kali bad pynmynsaw ia u Kenny. Ula shah dung naka bynta ka kpoh ha kaba ula shitom jur bad la pynkit ia u sha Dr. Norman Hospital Jowai ban ioh iaka jingsumar.

Haduh bala thoh iaka khubor ki Pulit kim pat lap ksai mano ba donkti halor kane ka kam.