Shah ther kuli ki pulit katba dang khynra ia ki nongtuh dieng ha Ranibari, shah kem 2 ngut

Syllad | The Rising MeghalayaMarch 26, 2024

Ki Pulit jong ka Ri Bhoi kila iohkem ia ar ngut ki briew kiba la kynnoh ba ki donkti ban ther kuli iaki pulit kiba leit khynra ia ki runar nongtuh dieng hapoh ka shnong Ranibari, Ri Bhoi District haka 26 tarik Lber.

Kane ka jingjia kala jia haka por mynstep kumba 9:30 AM haka jaka khlaw ha jan ka shnong Ranibari.

Ka khubor ka iathuh ba ki bor pulit mar ia ioh jingtip halor ka jingdon jong kane ka kynhun ki nongtuh dieng Sal, kumta ruh mar mar hapoh ka jingialam jong u IC ka Rani Border Outpost ki la her sha katei ka jaka, hynrei katba ki dang ngam kham shapoh jong ka khlaw la kynnoh ba kane ka kynhun ki nongtuh ki la sdang ban ther kuli sha ki pulit.

Hynrei la ong ba na ka liang ki pulit kim shym la ther kuli kylliang sha katei ka jaka ba don ki runar namar ka jingdon jong ki longkmie bad ki khunlung khynnah, hynrei ki la pynlong da ka jingkhang kdong bad kerkut ia kine ki nongtuh.

Hadien ba la khang kdong ki bor pulit ki la ioh ban kem suk ia arngut ki briew ia kiba la tip kyrteng kum u Ajit Rabha 18 bad ka Kavita Rabha 18 snem rta, bad ha ka jingtohkit ia kine ki arngut la shem ba kane ka kynhun jong ki nongtuh ka dei kaba ju mlien ban leh ia ka kam tuh dieng, tuh thuk thuk bad tuh kwai. La ong ruh ba u nongialam jong kane ka kynhun ki nongtuh la tip kyrteng kum u Rudra Rabha.

Ha ka jingleit ban khynra ia ka iingsah jong u Ajit Rabha, ki pulit ki la ioh ban kurup  ia kawei ka suloi SBML bad u kuli shara.

Kat haduh ba la ioh lum ia kane ka khubor, ki pulit ki dang bteng ban pynlong ka jingthwet ia kiwei pat ki dkhot jong kane ka kynhun ki nongtuh bad la ujor ruh da ka ejahar hapoh Khanapra police station.