Shah thombor kynhun ka kynthei ha WGH, shah kem 5 ngut hadien ba saphriang ka video

Syllad | The Rising MeghalayaJune 27, 2024

San ngut ki briew ki la shah kem noh ha ki bor pulit halor ka jingdonkti ha ka jingthombor naphang ia kawei ka kynthei briew hapoh kawei ka shnong kaba don ha ka thain ba pajih ha West Garo Hills District.

Kane ka jingjia kaba la pynher syrngiew ia kiba bun balang ka la jia hapoh ka shnong Teksragre kaba hap hapoh Dadenggre subdivision ha ka janmiet ka 25 tarik mynta u bnai, ong u SP ka West Garo Hills u Abraham T Sangma.

Hadien ba kane ka video ka la saphriang lyngba ki social media na ka liang ki bor pulit mardor ki la hiar sha katei ka shnong bad kem noh ia kitei ki shynrang briew kiba donkti ha kaba thombor ia katei ka kynthei kaba dang samla da kaba sympat tyngeh da ki siej wat hadien ba ka la iam lyniar bad kyrpad ba kin sangeh.

“Ha kaba nyngkong ngi la kem noh ia arngut ki briew kiba donkti ha ka 26 tarik mynta u bnai bad ha ka por janmiet ngi la ioh ban kem sa ia laingut kiwei pat,” ong u Abraham haba pyntip ba ia kine kiba shah kynnoh donkti yn ialam hakhmat ka iingkashari lashai ka sngi 27 tarik.

Nalor kata u la pyntip ruh ba kin dang bteng shuh shuh ia ka jingkem hadien ba ki la shim ia ka jingkren jong katei ka lanot kaba la ngat ha ka jingshah thombor bad kaba don mynta hapdeng ka jingshah sumar.

Haba kylli, na ka liang u SP u la ong ba kin phah ruh da ka jingthoh sha u nongialam shnong ha kaba iadei bad kane ka jingjia.