Shah ujor ejahar ki nongialam shnong ka Lumlakhiat ba tait shnong iaki lai ngut ha West Jaintia Hills

Syllad | The Rising MeghalayaApril 17, 2024

Arngut ki rangbah ki la ujor da ka ejahar pyrshah ia ki nongialam ka Dorbar Shnong Lumlakhiat, West Jaintia Hills namar ka jingdonkti ha kaba iadei bad ka jingtait shnong ia ki laingut ki briew kiba dei ki dkhot jong kajuh ka longkur.

Ia kane ka ejahar u ujor pyrshah da u Bah Thermonki Susngi na ka shnong Nartiang Moodop bad u Bah Diamond Dhar na ka shnong Lumlakhiat sha u Superintendent of Police (SP) ka District.

Ki nongujor ki la kynnoh ba ka Dorbar Shnong Lumlakhiat hapoh ka jingialam jong u Waheh Shnong u Bah Edward Shadap, u khun jong u, u Edmond Laloo bad u Secretary u Tisis Phira ki la ai ia ka jingmynjur ha u bnai Risaw 2023 bad kumjuh ha ka 5 tarik u Iaiong 2024 na ka bynta ban tait shnong ia kitei ki laingut ki dkhot jong ka kur Dhar kiba kynthup ia u Bah Biktor Dhar, Balen Dhar bad ia ka Meloris Dhar.

“Ki la byrthen pyrshah ia ki dkhot longiing jong kitei ki laingut kumjuh ia ki kur Dhar bad ruh ki la khanglad ia ki ba kin bteng ia ki kam rep kam riang hapoh ka shnong. Kumta ngi kyrpad jur ia phi ban tuklar lem bad ban shim ia ki lad jingpynshitom khnang ban pynthikna ba kin ym mih kino kino ki jingeh lyngba kane ka jingjia,” ong ka ejahar.