Shah ujor ejahar u DGP ha u heh pulit barim ba pyndonkam da u nombor plate thok ia ka kali
U Assistant Inspector General (AIG) barim ka Tnat pulit ka Meghalaya u GK Iangrai ha ka 9 tarik Jymmang, u la ujor da ka ejahar pyrshah ia u Director General of Police (DGP) ka Jylla u Lajja Ram Bishnoi halor ka jingkynnoh pyndonkam bakla bad leh thok ia u nombor plate na ka bynta ka kali sorkar ba u pyndonkam.
Ha kane ka ejahar ba la mudui da une u AIG barim hapoh Shillong Sadar Police Station, kata ha ka por ba une u DGP un sa shongthait noh ha ka 19 tarik mynta u bnai u la ong ba ka Enquiry Committee ba la thaw ha ka 18 tarik Naitung 2022, ha ka kaiphot jong ka kaba don ha ka Para 1 jong ka sla kaba 3 ka long kumne: “Kawei ka kali Hyundai Verna kaba pynieng ha Central Worshop ka dei kaba la pyndait da u nombor thok bad ym shym la don u registration nombor jong kane ka kali ba la leh da u AIG-A namar ka jingbym ioh ia ki kot ki sla.”
U la ong ruh ba kane ka kaiphot ka paw ba ka dei kaba la pynkhreh na ka shuki, kata khlem da leit ban tohkit sha ka jaka bad ban wad jingtip ia ki rekod na ka Tnat Transport.
Katkum ka shithi hapoh ka Right to Information (RTI) kaba 27 tarik Naitung 2023 kaba iadei bad katei ka kali Verna 1.6 VTVT ka dei kaba la rejistar bad ka Tnat Transport ka sorkar Meghalaya, Shillong kum ka nombor ML-02-A-0001, ha ka kyrteng jong u Director General of Police, ka sorkar Meghalaya.
“Kumta ruh kane ka jingtip lyngba ka RTI da ka Tnat Transport ka sorkar Jylla ka la pyniap bad pynkut noh ia ka kaiphot jong ka Inquiry Committee, kaba dawa ban leh ei ei katkum ka ain pyrshah ia ki dkhot ka Committee,” ong u Bah Iangrai.
Lah ban kdew ba u Bah Iangrai u dei uba la shah kem ha ka 2 tarik Naiwieng, 2022 halor ka jingkynnoh ba u pyndonkam bakla ia ka pisa bala mang ban tei ia ka National Emergency Response System (NERS) Building ha Shillong.
Kumjuh ruh ha ka ejahar, une u AIG barim u la ong ba sa kawei pat ka bynta kaba iadei bad kane ka phang ka long kaba thamula kumba ka paw lyngba kine ki jingshisha : “U Lajja Ram Bishnoi uba bat ia ka shuki kum u Director General of Police, Meghalaya ua la wan sha Shillong ban shimti ia kane ka kam ha ka 17 tarik u Jymmang 2022 da kaba pyndonkam da ka kali Kia Carnival Limousine model kaba lieh kaba don ia u registration jong ka Sorkar Assam, hynrei hadien kane, la iohi ba u Bishnoi lyngba ki buit poh u la pynkylla ia u nombor plate jong kane ka kali bad mynta u la buh da u nombor plate bathymmai uba don ia u registration number ML-02-A-0001,uba dei u nombor ba la rejistar ia ka kali Verna 1.6 VTVT.”
Nalor kata u la ong ruh ba la lap ba kane ka kali Kia Carnival Limousine rong lieh ka dei kaba shu shim wai na ka bynta ki kam kiba tang u Bishnoi u tip bha ha kaba u la pyndonkam ia kane kajuh ka kali na ka bynta ki kam shimet, kata kumba la sakhi na ki dur ki dar ba la shon ha ryngkat kane ka kali.
Shuh shuh une u AIG barim u la ong ba katkum ka Rules and Standard Guidelines, u Director General of Police ka Jylla Meghalaya u don hok ban ioh pyndonkam ia ka kali kaba hapoh ka dor kaba tang T.12 lak, hynrei kane ka kali Kia Carnival Limousine kaba u la pyndonkam ka dei kaba shongdor haduh jan kumba T.40 lak kaba une u DGP um don hok satia ban ioh.
“Kumta halor kine ki jingshisha baroh ki pynpaw beit thik ia ki jingleh kam bymman bad ki kam leh thok jong u Lajja Ram Bishnoi. Namar kata Nga kyrpad iaphi ban rejistar case pyrshah ia u DGP hapoh ki kyndon kiba dei biang bad ban tian bishar ia u khnang ba un ngat ha ka jingshah pynsaja halor kine ki kam bymman kiba u la leh,” ong ka ejahar ba la ujor da u AIG barim.
Facebook
Instagram
Youtube
Twitter
Leave a Reply