Shah ujor ka JHADC da ka jingpynkhein hukum iingbishar Meghalaya High Court

Syllad | The Rising MeghalayaDecember 22, 2023

Na ka liang ki nongtrei ka Jaintia Hills Autonomous District Council (JHADC) hapoh ka lama jong ka JHADC Staff Association ha ka 11 tarik mynta u bnai ki la ujor syndon da ka contempt of court pyrshah ia ka JHADC bad ia ka Sorkar Jylla namar ka jingbym pyntreikam ia ka hukum jong ka iingbishar Meghalaya High Court ban pyllait noh ia ka tulop jong ki hapoh ka hynriew bnai, kata naduh u bnai Lber mynta u snem.

Lah ban pynkynmaw hangne ba ka Meghalaya High Court ha u bnai Lber mynta u snem u haka jingshim bishar ia ka jingmudui jong ka JHADC Staff Association pyrshah ia ka Sorkar Meghalaya bad ka JHADC ka iing bishar kala pynmih iaka hukum. Ka iingbishar ka la hukum ia ka Sorkar ba kan pyllait noh ia baroh ka pisa kaba dang sahteng bad jingioh lum khajna sha ka JHADC hapoh ka hynriew bnai, bad ha kajuh ka por ka la hukum ruh ia ka JHADC ba kan siew dep ia ka tulop jong ki nongtrei hapoh ka hynriew bnai.

Ka jingap khmih lynti kaba haduh hynriew bnai kynthih jong ki nongtrei ka JHADC ka la kut noh khlem jingseisoh ha une u bnai Risaw ba la dep namar na ka liang ka Sorkar jylla kumjuh na ka liang ka JHADC kim shym la pyntreikam ia katei ka hukum jong ka iingbishar.  

Hapdeng jong kine ki hynriew bnai kiba la dep, ki nongtrei ka JHADC ki la pynlong da ki jingiakhih kiba jai jai kiba la bteng haduh lai sien ban kyrpad ia ka sorkar bad ki bor ba dei khmih ba kin pyllait noh ia ka tulop ka jong ki.

Ka High Court ka la pynlong ia ka hearing kaba nyngkong halor ka contempt petition ba la ujor da ka JHADC Staff Association ha ka 19 tarik une u bnai Nohprah.

Watla katta namar ka jingbym don advocate(s) na ka bynta ka Sorkar bad ka JHADC, kumta ruh ka iingbishar kan sa pynsngew biang ia ka rai ha ka 6 tarik u bnai Rymphang 2024.

Ha kawei pat ka bynta, ki nongtrei ka JHADC ki la ioh khyndiat ban pynhiar mynsiem hadien ba ka Executive Committee ka la pyllait ia ka tulop jong ki haduh u bnai Iaiong mynta u snem. Mynta ki la hap ban ap na ka bynta ka jingpyllait noh ia baroh ka tulop kaba dang sahteng jong ki naduh u bnai Jymmang mynta ka snem.