Shaniah ka KSP ha ka DC pynpaw ba ym don ka jingkhang ban leit jngoh ia ka krem Mawjymbuin

Syllad | The Rising MeghalayaJanuary 4, 2025

Ka Kutumba Surakshya Parishad (KSP) ha ka 3 tarik Kyllalyngkot ka la pynpaw ka jingshaniah ha ka bor pyniaid district bad ka Dorbar Shnong jong ka Mawsynram bad ong ba ka rai jong ki ha kaba iadei bad ka krem ​​Mawjymbuin kan batai ia ka lynti kaba kin shim nangne shakhmat.

Ia kane la pynpaw da u president ka KSP u Satya Ranjan Borah hadien ba u la leit ban iashim bynta ha ka jingialang ba la khot da ka Deputy Commissioner ka East Khasi Hills ka Kong RM Kurbah ha kaba la donlang ki nongialam shnong na ka Dorbar Shnong jong ka Mawsynram.

Haba pynbna ba ka mukotduma halor ka krem Mawjymbuin ka la kut, u Borah u la ong, “Nga tharai haduh kine ki sngi ka mukotduma Mawjymbuin ka la kut bad ngin sa peit kaei ka ban jia bad ki la pynmih ia ki hukum bad ngi ngeit halor kata.”

“Ngi ngeit ha ka jingialam jong ka bor pyniaid district jong ka Meghalaya bad ngin ap bad peit ha ki sngi ban wan bad kata kan batai ia ka lynti treikam jong ngi kaba hadien,” u la ong haba kren sha ki lad pathai khubor.

U Borah u la ong ba la pyntip sha ka kynhun jong ka KSP ha kane ka jingialang ba kam shym la don kano kano ka jingkhang da ka Dorbar Shnong Mawsynram.

“La shah ia baroh. Ym shym la don kano kano ka jingkhang. Kino kino ki lah ban leit shata ha baroh ki 365 sngi naduh ka por 9 baje mynstep haduh ka por 5 baje janmiet hynrei ki hap ban pynneh ia ki katto katne ki kyndon (SOP). Ki don katto katne ki SOP bad ngi pdiang shisha ia kita ki SOPs.” u la pyntip katba u la bynrap ba la pynthikna ruh ia ka kynhun halor ki katto katne ki jingpynbeit ba kyrpang.

“Kumta ym don jingkhang ia ka jingleh niam jong ngi hangta. Ka jingleh niam ka mut ngin shong hangta pynlong ia ki jingduwai jong ngi bad ia kata lah ban leh ha kano kano ka por ha kano kano ka jaka,” kam u president ka KSP.

Da kaba kyntait halor kano kano ka jingbyrngem, u Borah u la ong, “Kam don kano kano ka jingbyrngem na ki kynhun Hindu. Ki briew ki ialam bakla ia kiei kiei. Hooid, ngi ong shaphang ka jingkhang surok lada ym weng noh ia ka jingkhang lehniam hynrei ki ong ba kam don jingkhang.”

Haba kylli, u la ong, “Ngam lah ban ong eiei mynta namar ba ki bor sorkar bad ka dorbar shnong ki la dep pynthikna ba kam don jingkhang bad kin plie baroh 365 sngi naduh ka por 9 baje mynstep haduh ka por 5 baje janmiet. Ngi don ka jingshaniah ha ki. Kumta ngin peit ia kaei kaba ki leh bad nangta sa rai ia ki sienjam kiba bud.”

“Ka shong ha ki paidbah. Ka dei ka jinglong jong ki paidbah. Ka dei ka khubor kaba shai jong ngi sha baroh ki briew ka dei jong ka Meghalaya, Assam bad kumjuh ruh kum ki nongshong shnong jong ka ri India – baroh ngi dei ki nongshong shnong jong ka ri India bad ngi don ki kamram ba kongsan na ka bynta ka ka jaitbynriew. Kawei pa kawei ka jingtrei jong ngi ka dei ban long na ka bynta ban pynskhem ia ka jinglong ba janai jong ka jaitbynriew bad ka jingiatylli ha ka imlang sahlang,” bynrap u Borah.

Nalor kane, u president ka KSPula kyntu ia baroh kiba don ia ka jingsngewkhia ban burom ia ka riti synshar ka ri India.

“Nga kyrpad ia baroh kiba dei na Meghalaya, Assam bad na kylleng ka ri India – baroh kidei ban burom ia ka riti synshar ka ri, baroh ki dei ban pynlong kordor ia ka riti synshar ka ri bad nga tharai ba shisien ba ngi pyndep ia la ka kamram kumba la kdew ha ka Article 51 (a) jong ka riti synshar ka ri, kam dei ban mih kano kano ka kynrum kynram ha kine ki sngi ban wan” ula ong.