Shano ka hok thep Vote!!! Ki Dorbar Shnong kila dep rai

Syllad | The Rising MeghalayaFebruary 21, 2019

JOWAI: Ki ba bun ki Dorbar Shnong ha rilum Jaiñtia kila dep shim rai lypa ïano ban vote haka elekshon bad kane ka pyndiaw ïa kiba bun ki samla ki ban thep ïaka vote kaba nyngkong ka jong ki haka MDC election.

Ka kynhun jong ki samla pule kila pynpaw ka jingsngewkhia halor ka jinglong jingman ha Ri Lum Jaiñtia namar ba ki Dorbar Shnong kila khleh politik.  Ki Dorbar Shnong jong ki katto katne ki shnong kila dep shim rai lypa ban jied ïa u kyrtong monlang uba la pynieng da ka shnong  bad ki nongshong shnong ruh kin kyrshan ïa uta u kyrtong ba ka kyrshan.

Haba kylli balei ba kim pyrshah ïaka rai jong ki Dorbar Shnong, ki katto katne ki samla pule (bym kwah pynpaw kyrteng) ki la ong ba katto katne ki nongïalam jong ka Dorbar Shnong hadien ba kila dep ïasyllok para ma ki bad ki shim rai ïa uno u nongshong shnong ne kyrtong ban jied kum u kyrtong monlang bad hadien kata kin sa pynlong ia ka Dorbar ba kumno re kumno ki pynrung ha ka khlieh ki nongshong shnong bad jied ia uta kum u kyrtong monlang.

Uwei na ki samla pule u la ong ba ka Constitution jong ka Ri India ka la pynkup bor ia ki nongshong shnong ïa ka hok ban kren laitluid bad pyrkhat ne leh laitluid ne kata ka freedom of speech and expression kaba mut u ne u ki don hok ban jied laitluid ïano ïano ha ka elekshon. Hynrei kane ka jingjied kyrtong monlang da ka Dorbar Shnong kala iuhroit noh ïa ka hok jong ki nongshong shnong ban jied laitluid ïaki nongmihkhmat.

Kane ka rai jong ka Dorbar shnong kala wanrah ka jingbym sngewtynnad ïa kiba bun ki samla kiba dang shu ïoh vote thymmai bad lada ki mut ban leh pyrshah ruh ka wanrah ka jingshah tharai sniew na ki nongïalam shnong bad bun ki sheptieng ban ïaid pyrshah ïaka shnong namar ïoh jia ba shah kyntait haka imlang ka sahlang ne ka shah tait shnong.

Kine ki samla pule kila pynpaw ïaka jingbynniaw ba ka aiñ pynkup bor ïaki Waheh Shnong-Ka Jaintia Hills Autonomous District (Establishment of Elaka and Village and Election, Appointment, Powers, Functions and Sirdars of Dolloi/Sirdar and Waheh Shnong) Act 2015 namar ba kam shym la kdew shai ne khang ïa ki Dorbar Shnong khamtam u Waheh Shnong (katkum ka Sanad) ban ïasylla haki kam politik ne elekshon bad dei kane kaba ki pynmih ïaki rai kiba pyrshah ïaka hok jong u nongshong shnong.

“Ki don katto katne ki Dorbar Shnong kila dep rai jied nongmihkhmat bad la maham ruh ban pynduh ïaki jingiarap ia ki briew ba ialeh pyrshah ia ka rai ka Dorbar Shnong”, la ong kawei ka longkmie kaba hapoh Jowai constituency.

Kaba phylla ba ka bor pynïaid elekshon haka Jylla ne ka District ki ialap ban pynlong ïaka jingthep vote kaba khuid kaba suba, hynrei kumba jia long ha Rilum Jaiñtia bun hi ki Dorbar Shnong ki ïasylla politik bad la dep pynbna sha ki lad pathai khubor ba rai kyrshan ïa u/ka kyrtong ha ki dorbar shnong bad ki bor pynïaid District ki leh kuman.

Mynta kine ki samla pule ki phai khmat tang sha ka ïing bishar High Court ban kan tuklar bad tehlakam ïaki Dorbar Shnong bad khang pyrshah ïaki shnong na ki kam elekshon bad ban jied kyrtong monlang.