Shem shitom ki phareng ban ialeh pyrshah ia ki shipai u Kiang Nangbah: Dr. Kharlukhi

Syllad | The Rising MeghalayaDecember 30, 2023

Ka Seiñraij Jowai haka sngi Saitjain ka la rakhe kynmaw burom kyrpang ia ka lyngkhuh sngi iap ba 161 snem jong u Woh Kiang Nangbah ha ka jingialang kaba la long ha Myngkoi Pyrdi, Loompyrdi Iongpiah, Jowai ha ka jingiadon lang u MP ka Rajya Sabha u Dr. Wanweiroy Kharlukhi kum u kongsan.

Ha ka jingkren u Dr. Kharlukhi u la ong ba ka jingiap jong u Woh Kiang Nangbah ha u tyllai phasi 161 snem mynshwa ka long ban pynioh laitluid iala ki jong ki briew bad ban pynsah ia ka nam ka burom ia ka jingshlur bad ka jinglen lade ka jong u pateng la pateng.

U la ong ruh ba katkum ki jingthoh ba la ioh na ri Bilat ia kaba la pynmih ha u snem 1863, la iathuh ruh ba ki shipai phareng ki la shem shitom shibun ban iakhun pyrshah ia ki bor shipai ba la ialam da u Woh Kiang Nangbah ha kaba 3 ngut ki nongialam shipai phareng ki la shah pyniap ha Ri Jaintia.

Nalor kata u la ong ruh ba lada dei ha kane ka juk kaba mynta u Kiang Nangbah un jin da la ioh pdiang ia ka khusnam kum u heh nongialam shipai ha ki kam ialeh thma namar ka jingpyndonkam ia ki buit katkum ka jinglong jingman jong ki jaka ban iakhun pyrshah ia ki shipai phareng.

Katba u Dolloi ka Elaka Jowai ha ka jingkren u la pynkynmaw ia ka kot sahkynmaw ba la thoh da u Dr. Kharlukhi ha u snem 1992 shaphang u Kiang Nangbah uba la ieng ialeh pyrshah ia ki shipai phareng namar ka jingkhang pyrshah ban pyndep ia ka lehniam leh rukom na ka bynta ki metiap jong kito kiba la khlad ha Jowai.

La ong ruh ba u Woh Kiang Nangbah uba wan na ka longiing kaba duna ha ka ioh ka kot u la wan iashim bynta ha ka jingialang bah kaba la long ha Madiah Kmai Blai hadien ba ka la mih ka dak jingmaian Blei da kaba ngam hapoh ka Wah Myntdu ban dei ia u dieng ba don lai pnat hadien ba u la shim ia ka jingkitkhlieh ban iakhun pyrshah ia ki shipai phareng.

Shuh shuh ha kane ka sngi la pynkup burom ruh ia ki president bad Secretary barim jong ka Seiñraij Jowai bad da kaba sam ruh ia ki khusnam sha ki nongjop ha ki jingiakop bapher bapher ba la pynlong ha kane ka taiew lehkmen.