Shen ka sorkar kan kyntiew iaka bai bylla sngi ki nongtrei muster roll: Comingone Ymbon

Syllad | The Rising MeghalayaAugust 18, 2024

Ka All Jaiñtia Muster Roll Workers and Labour Union, Central Executive Body haka 17 tarik Nailar kala pynlong iaka Annual General Meeting kaba 9 haka shnong Shangpung haka jingdonlang u Myntri ka sorkar Jylla bad MLA ka thain Bah Comingone Ymbon kum u kongsan.

U Bah Comingone Ymbon haka ai jingkren ula pyntip ba shen ka sorkar kan sa pynkiew noh iaka bainong ki nongtrei Muster Roll bad ka tnat Labour kala dep ban wanrah ia kane ka mat bad naka liang ka sorkar ruh kala dep ban shong iathir sani naka bynta ban kyntiew iaka bai bylla sngi.

U adviser ka synjuk ki nongtrei muster roll u Khroo L. Pariat, ka president Kong Dayoowanphi Ïakai, general secretary Hunbeitki Dkhar, Jerry Anderson Suting kila pynsngew iaki jingeh bad jingiaid lynti bad jingeh jong ka seng.

Ha kane ka sngi kila aiti ruh iaka dorkhas ban pyntreikam noh iaka Regular Casual workers scheme 1996, ban pynthymmai iaka rta shongthait ki nongtrei Muster Roll naka 58 snem sha ka 60 snem ka rta, ban pyntreikam iaka Maternity Benefit Act, 1961 kaba la pynkylla ha u snem 2017 bad kumjuh ban pyntreikam iaka Employees Provident Fund.

Ha kane ka jingialang paidbah la pynsngewthuh halor ka jingpang HIV AIDs. U riew shemphang uba long u Deputy Director (IEC and Mainstreaming) Meghalaya AIDS Control Society Bah Ajoy Lanong ula kren bad iathuh iaka tynrai bad kumno ban iada naka jingpang HIV AIDS