Shen yn buh kyndon ka MeECL na ka bynta ka jingshngain ka jingkieng Umiam: Goyal

Syllad | The Rising MeghalayaJune 22, 2024

U Chairman-cum-Managing Director (CMD) ka Meghalaya Energy Corporation Limited (MeECL) u Sanjay Goyal ha ka 21 tarik Jylliew, u la pyntip ba shen yn sa pyntreikam ia ki kyndon ban tehlakam ia ki kali kiba kit palat ka jingkhia kiba iaid lyngba ka jingkieng Umiam hadien ba la dep ban maramot ia ka jingkieng bad shna pynkhlain ia ka dam.

Haba kren sha ki lad pathai khubor, u Goyal u la ong, “Ka jingbuh kyndon halor ka kit ka bah jong ki kali kan don beit. Ngan pynpaw da kaba shai ba kane ka jingshna pynkhlain ia ka dam bad ka jingkieng ka long khamtam ban pynneh ia ka kumba ka dei ban long khnang ba kan ym don shuh ka jingjulor ia kane ka jingtei hadien habud.”

U la ong ruh,”Ngi dang iamir jingmut bad ka Indian Institute of Technology (IIT), Guwahati bad ngin sa pynmih ia ka jingpynbna ha kaba iadei bad ka jingpyrkhing kyndon ia ki kali kit jingkit kiba iaid lyngba kane ka jingkieng hadien ba la pyndep lut ia ki jinshna baroh bad ngin pyrshang ban pynthikna ba kan don ka jingbud ryntih ia kane ka jingpynjari kyndon.”

Nalor kata u la ongruh ba na ka liang ka Tnat ka la buh ruh da ki CCTV camera khnang ban pynthikna ba ki kali kiba kit palat ka jingkhia kim dei shuh ban iaid shuh lyngba kane ka dam.

“Kane ka dei ka jingtei jong u paidbah bad ka jingthmu jong kane ka jingtei ka long ban pyniasoh…to ngin ym leh satia ia kano kano ka kam ka ban wanrah ka jingpynjulor ia ka jingkieng bad buh ha ka jingma. Lyngba jong phi nga kwah ban ong ba kane kam mut ba mynta kane ka jingkieng kala plie ia baroh ki jait kali ba kin iaid laitluid” ong u Goyal.

Ia kane ka project kaba la pynlut haduh kumba 24-25 klur la pynkhreh ban pyndep noh kat haduh ka 31 tarik u Naitung u ban wan.