Shen yn khot jingialang ka sorkar bad ki kynhun kiba iadonbynta halor ka MRSSAB, 2020

Syllad | The Rising MeghalayaNovember 15, 2023

U Symbud Myntri Rangbah ka jylla uba khmih ia ka Tnat kam Pohiing, u Bah Prestone Tynsong haka 15 tarik Naiwieng ula pyntip ba ka sorkar jylla shen kan khot ia ka jingialang bad baroh ki kynhun kiba ia don bynta ban iamir jingmut ha kaba iadei bad ka shithi ba la phah da ka Ministry of Home Affairs (MHA) hadien ka jingpynphai ia ka Meghalaya Residents Safety and Security Amendment Bill (MRSSAB), 2020.

Ia kane u Bah Tynsong u la pyntip sha ki nongmihkhmat jong ka seng Hynniewtrep Youth Council (HYC) ha ka jingiakynduh kaba la long haka 15 tarik Naiwieng.

Haba kren sha ki lad pathai khubor, u president ka HYC u Bah Roy Kupar Synrem u la ong ba kum ka kynhun ki la pan ka jingpynshai na ka sorkar halor kane ka jingpynphai jong ka MHA ka sorkar pdeng ia ka MRSSAB, 2020.

“Ha ka jingiakren, u Dy CM u la pyntip sha ngi ba ka MHA ka la pynphai ia kane ka Bill da kaba hukum ruh ia ka sorkar jylla ba kan bishar bniah biang ia ki kyndon kiba iadei bad kane ka Bill,” u la ong.

“Ha kaba iadei bad kiei ki kyndon ia kiba dei ban bishar bniah biang da ka sorkar, na ka liang u Dy CM u la pyntip sha ngi ba ka MHA ka don ia ki katto katne ki kyndon ha kaba iadei bad ka jingpynieng ia ki khyrdop jaka rung jaka mih katkum ba la kdew ha kane ka Act, kata namar kiba kum kine ki khyrdop kin wanrah ka jingbym suk hapdeng ki nongwan jngohkai lane ki briew kiba wan rung sha ka jylla,” ong u nongialam ka HYC.

Nalor kata u la ong ruh ba ka MHA ka don ia ka bor ba kino kino ki Bill ne Act ia kiba la thaw da ki sorkar jylla kim dei ban long pyrshah ia kino kino ki Act ba la mynjur da ka parliament, kumta ki dei ban khmih bniah halor kitei ki artylli ki bynta.

U Bah Synrem u la ong ruh ba ka kynhun ka la kyrpad ia u Dy CM ba un pynioh ia ka jingthoh kaba iadei bad katei ka shithi ba la phah da ka MHA khnang ba na ka liang ka jong ki ruh kin lah ban aijingmut lang sha ka sorkar.

Shuh shuh u Bah Synrem u la ong ruh ba um lah ban kynthoh ei ei ha kaba iadei bad ka shithi ka MHA hynrei ka jingdawa jong ka Seng HYC ka long ia u Lat ka jylla ba un pynkloi ban ai ka jingmynjur ia ka MRSSAB, 2020.

“Ngi la pynpaw halor ki artylli ki jingdawa na ka sorkar, kata lada phim lah ban ai ia ka Inner Line Permit (ILP), phi dei ban pynurlong ia ka MRSSAB, bad ha kajuh ka por ngi sngewthuh ba ka sorkar pdeng ka don khyndiat ka jingartatien ban ai ia ka ILP, kumta ngi kyrpad ia ka sorkar ba kan ai ka jingmynjur ia kane ka amendment Bill. Watla katta katkum ka jingsngewthuh ia mynta hi kane ka Bill kan dang shim por namar kan don shwa ka jingiamir jingmut kumno ban pynbit pynbiang khnang ba ki jingsngewkhia ba la pynpaw da ka MHA kin ym long ka jingeh na ka bynta ka jylla ba kan lah ban pyntreikam ia kane ka Act,” ong shuh shuh utei u nongialam ka HYC.