Shen yn khot tender ka Sorkar ban pynheh ia ka Umroi Airport

Syllad | The Rising MeghalayaJanuary 28, 2025

U Symbud Myntri Rangbah ka Jylla uba khmih ruh ia ka Tnad Transport u Bah Sniawbhalang Dhar ha ka 27 tarik Kyllalyngkot u pyntip ba ka Sorkar shen kan khot tender na ka bynta ka jingpynheh ia ka Umroi Airport.

Haba kren sha ki lad pathai khubor, u Bah Sniawbhalang u la ong, “Shen ngin sa khot tender na ka bynta ka jingpynheh ia ka Umroi Airport.”

U la ong ruh ba kane ka jingtyrwa ban pynheh ia kane ka kad liengsuin kan ym don satia kano kano ka jingktah ia ka surok iaid liengsuin (runway) kaba la don lypa bad kan ym pynthut ruh ha kaba iadei bad ka jinghiar jong ki liengsuin.”

Haba kylli, u Bah Dhar u la ong ba na ka liang u Myntri Rangbah ka Jylla u Conrad K Sangma u la dep khot ruh ia ka jingialang ha ka kyrdan ka jong u ha ryngkat ki heh jong ka tnad Shipai bad Airport.

“Baroh ki long kiba iaid beit iaid ryntih. Ngi la thmu satang ban pyniaid noh ia ka kam.Kyrmen ba tang hapoh ar lane ar snem shiteng ki liengsuin heh kin lah ban wan hiar hapoh Umroi Airport bad kan long ka jingkylla kaba khraw ia ka Jylla Meghalaya,” u la bynrap.