Shen yn khot tender thymmai ban pyniaid ia ka 108 Emergency ha ka Jylla: Ampareen

Syllad | The Rising MeghalayaSeptember 25, 2024

Ka Myntri ka Tnad ka Koit ka Khiah ka Kong Ampareen Lyngdoh ha ka 24 tarik Nailur ka pyntip ba ka Sorkar shen kan sa khot tender thymmai na ka bynta ban pyniaid ia ka jingtreikam jong ka 108 Emergency Services ha ka Jylla.

Kumba ka long mynta ia ka jingshakri jong ka 108 la khmih bad pyniaid shipor da ka National Health Mission (NHM).

“Mynta ngi la don ha ka lynti ban khot tender thymmai na ka bynta ban pyniaid ia ka 108 Emergency Services ha ka Jylla,” ong ka Kong Ampareen haba kren sha ki lad pathai khubor hadien ka jingialang bad ki nongmihkhmat na ka 108 kiba la pynpaw ka jingsngewnguh ia ka sorkar halor ka jingpynkiew ia ka tulop na ka bynta jong ki.

“Ka Myntri ka kyrmen ruh ba ha kane ka kynti kaba mynta kan ym don jingeh ha kaba iadei bad ka jingkhot tender kumba la jia na ki jingbakla ha ki por ba la dep. Ha kane ka kynti, ngi don shibun ki tnad kum ki dkhot jong ka Committee ki ban bishar bniah ia ki kot ki sla jong ki nongkhlieh dor,” ka la ong.

Ngi donkam ban pynkloi ha kaban pynbeit iaki jingeh shwa ba ki nongshimti kin wan shimti khnang ba haba kin wan kin tip thikna ia kaei kaba ki hap ban shimti, kiei ki kyndon bad ki jingpynbeit kiba ngi buh ha khmat jong ki, khlem kine baroh, kan long kaba eh ia ki nongtrei 108 ba kin ioh ia ki hok jong ki kum ki nongtrei ha ka rynsan kaba pura ban ai ia ka jingshakri ia ka jylla,” ka la bynrap.