Shen yn phah ka MSPB ia ka jingai jingmut ban weng ia ka jingdheng kali ha Shillong: Metbah

Syllad | The Rising MeghalayaSeptember 24, 2024

U Chairman ka Meghalaya State Planning Board (MSPB) u Bah Metbah Lyngdoh ha ka 23 tarik Nailur u la ong ba ka Board ka la rai ba shen kan phah ia ka jingai jingmut ha kaba iadei bad ka jingjur jong ka jingdheng kali ha sor Shillong.

Haba kren sha ki lad pathai khubor hadien ka jingialang, u Bah Metbah u la ong, “Hadien ka jingialang bad baroh ki Tnad treikam kiba don bynta ngin sa pynkhreh bad aiti ia ki jingai jingmut kiba bniah sha ka sorkar Jylla ban leh ei ei ha kaba iadei bad ki jingeh namar ka jingdheng kali kaba jur ha sor Shillong.”

U la pyntip ha ka jingialang ha kane ka sngi ba haduh saw tylli ki tnad ki la ai ia ki jingbatai kiba bniah, kata na ka liang ka Tnad Urban Affairs, ka PWD, ka Tnad Transport bad Home Police kiba la pynpaw ia ki jingeh bapher bapher ba ki la iakynduh ha ryngkat ki jingai jingmut.

U la ong ruh ba ka Board kan iai bteng ban iakynduh ia ki Tnad bapher bapher ha ki sngi ki ban dang wan bad ka jingialang ha ka sien kaba ar ka lah ban long la kumno kumno hapoh ka shitaiew.

“Ka bynta jong ka Board ka long ban aijingmut ia ka sorkar ha kaba iadei bad ki sienjam ba ka sorkar ka dei ban shim khnang ban lah ban lah ban weng ia ki jingeh. Ngi la sdang lyngba kine ki saw tylli ki Tnad bad ngim pat shym la rai satia ha kane ka jingialang kaba dang shu dep, hynrei ngin dang hap ban shong ha kaba ngin sa nang sngap na kiwei pat ki Tnad bad ngin sa phah ia ki jingaijingmut,” ong u Bah Metbah.

Ha kawei pat ka liang, u Chairman ka MSPC u la ong ba ka Board ka la aijingmut ban leh ei ei noh mardor ha ka ban pynduna ia ka jingdheng kali da kaba thung shuh shuh ia ki pulit Traffic.

“Ha kane ka jingialang, ka Tnad Pulit ka la kdew ia ka jingeh na ka jingsuna briew. Ki don tang 150 ngut ki pulit langrut na ka bynta ki 7 tylli ki police station. Kane ka dei ka bynta kaba hap ban leh ei ei noh kloi. Ngin sa phah ia ka jingai jingmut sha ka sorkar ba kan rah hakhmat ka Tnad kam pohiing na ka bynta ban thung shuh shuh ki pulit langrut ki ban don ha ki surok,” u la ong. Kumta ka long mynta ki don tang 100 ngut bad ki don kumba 400 ngut ki homeguards. Ngim lah ban khmih lynti than na ki homeguard. Na ka liang ka Tnad kam pohiing ka la kular ban shimkhia mardor na ka bynta ban teh kyndon ia kiba pynkhein ia ki Traffic Rules.”

Haba kylli, u Bah Metbah u la ong, “Ka Shillong ka dei ka sor kaba khlem da plan, kam don ka jingartatien halor kane bad dei na kata ka daw Nga la aijingmut ia u Myntri Rangbah ha u snem 2018 ba ka sorkar ka dei ban mih noh na Shillong bad ban plan ia ka sor kaba thymmai, bad ka sorkar ka la iaid ha kane ka lynti.

Haba jubab ia ka jingkylli u Bah Metbah u la ong ruh, “Phi iakren halor ka jingkhapngiah ki surok ha ki por long skul, kata la dei ha ka por mynstep lane janmiet kumjuh. Ha kine ki kynta phi iohi ia shibun bah ki kali ha ki surok, kumta ka Tnad Urban ka la sdang ia ka STEM scheme ha kaba ngi lah ban ioh ia ka jingduna ka jingdon ki kali kiba iaid ha kiba kum kine ki kynta. Hynrei, watla katta ha ka jaka jong ki 12-13 tylli ki kali tang kawei ka bus ka la lah ban iaid.