Shen yn pyllait ka KHADC iaka kot halor ki kur Khasi

Syllad | The Rising MeghalayaOctober 25, 2024

Ka Khasi Hills Autonomous District Council (KHADC) shen kan sa pyllait paidbah ïa ka kot halor ka rukom treikam jong ki Kur Khasi. Kane kan iarap ha ka jingpyntreikam hok ïa ka KHAD (Khasi Social Custom of Lineage) (Amendment) Bill, 2023, kaba la ïoh jingmynjur na u Lat ka Meghalaya haka 24 tariki u Risaw

Ha kaba ïadei bad kane, u CEM jong ka KHADC, u Bah Pyniaid Sing Syiem, u la ong, “La leh ïa ka jingwad bniah kaba jylliew ha kaba ïadei bad ka rukom kheiñ kur jong ka jaidbynriew Khasi. Kane kan iarap ban pyntrei kam ia kane ka ain. Ki don 28 tylli ki bynta jong ka jingwad bniah bad shen ngin pynmih ia ki baroh ha ka dur jong ka kot. La dep ban pynlong iaka jingpule bniah bad ka don ha ka lynti ban pynmih.”

Katkum ka jingwad bniah, ki don palat 3000 tylli ki Kur hapoh ka imlang sahlang Khasi.

Ka jingwad bniah ka dei kaba la pynlut pisa da ka KHADC ha ryngkat ka jingïatreilang bad ka sorkar jylla. La buh ka mang pisa kaba T. 50 lak tyngka ban pyndep ïa kane ka jingwad bniah, kaba la shim por kumba 10 bnai.

Haba kren shaphang ka Amendment Bill, u Syiem u la ong, “Ka Ain ba kongsan ka dei ka KHAD (Social Custom of Lineage) Act, 1997. Ngi la pynrung ha kane ka Amendment Bill ïa ka jingpynïaid Kur namar ba ka KHADC bad ka Kur ki dei ban long kum kawei. Te, ngi la wanrah ïa kane ka Amendment ban pynrung ïa ka jingpynïaid Kur ha kane ka Ain.”

“Ngi la pynshai ba kino kino ki Kur hapoh ka Khasi Hills ki dei ban register bad ka KHADC namar ba ha ki snem ba la leit, ki don ki Kur kiba shim kabu, wat ha kaba ai ïa ka Certificate Kur, ki ai da lade hi khlem ka jingtip jong ki dkhot Kur. Kane ka long kaba ma kumta ngi wanrah iaka amendment ban pynrung ïa kane ha kane ka bill,” u la ong.

“Kino kino ki Kur kiba kwah ban register, ki dei ban wan sha District Council. Bad hadien ka jingmynjur lang jong baroh ki dkhot Kur, kin wan ban register bad ngi lah ban ai ïa ka Certificate. Kine ki Kur ki dei ruh ban jied ïa ki nongïalam jong ki, ba kin ïoh ïa ka bor ban ai ïa ka Certificate Kur sha baroh ki dkhot jong ka Kur,” u la ïathuh shuh shuh.