Shen yn pyllait ka sorkar ia ka 52 klur ban pynkhuid ia ka tulop ki nonghikai SSA

Syllad | The Rising MeghalayaAugust 29, 2023

U Adviser ka tnat pule puthi ka sorkar Meghalaya, u Bah Himalaya Shangpliang mynta ka sngi ba Ar u la ong ba ka sorkar MDA-II ka la shim ia kiba bun ki sienjam kiba iadei bad ki nonghikai SSA ka jylla, bad shen kan sa pyllait ia ka pisa kaba T.52 klur khnang ban lah ban pynkhuid ia ka tulop jong ki nonghikai skul SSA.

Haba kren shibynta jong ka jingialang pynkup burom ia ki nonghikai SSA mynta ka sngi, u Bah Shangpliang u la ong ba ki kyndon ia kiba ngi dei ban pyndep halor ki mat kiba iadei bad ki nonghikai skul SSA ki la iaid shakhmat.Ia ka file la dep lypa ban phah na ka tnat treikam, bad mar ia pyllait na ka liang ka sorkar, ngin lah ban pyllait ia kane ka 52 klur na ka bynta ki nonghikai SSA.”

Nalor kata u la ong ruh ba nalor kane ka 52 klur, na ka liang ka sorkar ka la pynthikna ruh ban pyllait ia ka arrear kaba dang sahteng mynta lah kumba katto katne snem.

U Bah Shangpliang u la ong ruh ba ia ka arrear kaba nyngkong la lah ban pyllait ha u bnai Jylliew ba la dep, ia ka second installment la pyllait mynta u bnai, bad ki sienjam kiba iadei bad ka jingsiew ia ki tulop ka la dep iaid lypa shakhmat.

Shuh shuh u la ong, katba ka sorkar ka la shimkhia halor baroh ki mat kiba iadei bad ki nonghikai skul SSA, na ka liang ka Tnat pule puthi ka kwah ruh ban iohi ia ka jingkiew shakhmat jong ki skul SSA ha ki sngi ki por ki ban wan.