Shen yn pynbna ka sorkar Jylla ia ka khubor ba bha na ka bynta ki nongtih dewiong

Syllad | The Rising MeghalayaMay 16, 2024

U Myntri Rangbah ka Jylla u Conrad K Sangma u la ong ba ka sorkar shen kan sa pynbna ia ka khubor ba bha ha kaba iadei bad ka jingpynkhreh ban sdang noh ia ka jingtih dewiong katkum ka juk jingstad ha Meghalaya hadien kane ka election Lok Sabha.

Haba kren sha ki lad pathai khubor ha ka 15 tarik Jymmang, u Sangma u la ong ba ka jingpyniaid ia ki kam ha ka kyrdan jong ka sorkar pdeng ka la dep bad mynta kaba sah ka long tang halor ka bynta kaba iadei bad ki lad jingiada ia ka mariang ha ka sorkar Jylla.

“Ngi khmih lynti ba ngin lah ban pyniaid shakhmat ia kane ka kam bad shen kumba Nga ong kan shim satnag khyndiat por, kata tang hadien ka ilekshon, bad ngin khmih ba ngin lah ban pynsngew ia ka khubor kaba bha sha ki paidbah,” u la ong.

U la bynrap ruh da kaba ong, “Hynrei, kumba Nga ong, Ngam kwah shu leh kyrkieh namar kine ki dei ki kam kiba dang jia nyngkong eh ha ka jylla, ngi lah ban don ki jingbakla kiba lah ban pynjlan biang ia ka kam. Ngam khmih lynti ia kata, hynrei namar ka dei ka sien kaba nyngkong kumta barabor kam ju long kaba suk. Hynrei ngi kyrmen skhem ba shen ngan lah ban shim noh ia ka rai.”

Na ka liang u CM u la ong ruh ba ka jinglong jingman ha ka Meghalaya ka dei kaba kham pher ha kaba iadei ba ki rukom bat khyndew. Ha ka por ba ka iingbishar Supreme Court ka weng noh ia ka jingkhang tih dewiong bad iai ban ban tih da ka lynti jong ka juk kaba thymmai, ka sorkar India kam tip bha ia ki kyndon ha kaba iadei bad ki ain bat khyndew kumba long ha Meghalaya ha kaba ia ki jaka la longtrai da ki riew shimet ym da ka sorkar kumba long ha kiwei pat ki bynta jong ka ri ha kaba ki jaka ki dei jong ka sorkar bad ba ki briew kiba kwah ban tih par kin hap ban aplai bad ban shim wai na ka sorkar ban tih par. 

“Namar ka dei ka jingjia ha ka sien kaba nyngkong, ka la shim kham bun ka por ban ia kaba ngi khmih lynti.Kumta dei na kata ka daw kaba la pynslem ban pyndep ia ki jingdonkam, hynrei ka bynta kaba kham shem shitom ka long ban thaw ia ki rukom treikam, ki kyndon bad ki policy na ka bynta ki nongtih par hadien habud,” u la bynrap.

Kumjuh u CM u la pdiang sngewbha ia ka jingai jingmut jong ka Single Member Committee ka iingbishar Meghalaya High Court da kaba ong ba ka jingthaw ia kiwei pat ki lad kamai jakpoh ha ka jylla khamtam ha kito ki district kiba riewspah ha ka jingdon ia u dewiong ka dei ka policy bad ki rukom treikam jong kane ka sorkar naduh kine ki hynriew snem kiba la dep.

“Kumtaruh kaei kaba ka iingbishar ka la pynpaw ka dei kaba dei bad kane hi ka dei kaba ngi la pyniaid shakhmat. Ha kine ki san snem kiba la dep jong ka sorkar MDA, ka dei ka thong jong ka sorkar ban thaw da kiwei pat ki lad kamai kajih bad kumta ruh la sdang ia ki mishon bapher bapher iba don mynta,” u la ong.

Shuh shuh u CM u la pyntip ba da ki hajar ngut ki nongrep ki la ioh jingmyntoi lyngba ka mishon Lakadong ia kaba la pyntreikam da ka sorkar Jylla khamtam ha kito ki jaka kiba jur ki jingtreikam dewiong.

U la ong ruh ba lyngba kane ka mishon ki la mih shibun ki kynhun SHG kiba pyniaid ia ki kam karkhana rit kiba la lah ban kyntiew da shiphew shah ia ki jingtreikam.Mynta ia ki song jong u shynrang Lakadong la lah ban shalan sha kiwei pat ki ri ka pyrthei kum sha Japan, UAE bad wat shapoh ki ri Europe bad US.