Shen yn pynlong ka sorkar da ka public hearing ban pynkynriah ia ka Marten

Syllad | The Rising MeghalayaJune 1, 2024

U Symbud Myntri Rangbah ka Jylla uba khmih ia ka Tnat Urban Affairs, u Bah Sniawbhalang Dhar ha ka 31 tarik Jymmang, u la ong ba ka sorkar Jylla shen kan pynlong da ka public hearing na ka bynta ban pynkhreh ban ioh ia ka jaka theh niut kaba thymmai na ka bynta ka nongbah Shillong.

“Shen ngin lah ban pyndep ia kane ka kam. Mynta ka dang sah ban pynlong sa ia ka public hearing,” ong u Myntri.

Kham hashwa na ka liang ka sorkar ka la tyrwa na ka bynta ban buh ia kane ka jaka theh niut kaba thymmai ha Nonghali kaba hap hapoh Mawryngkneng constituency.

Ka jingdonkam ia ka jaka theh niut kaba thymmai ka la wan long hadien ba ka por na ka bynta ka jaka theh niut kaba mynta ha Marten ha Mawlai Mawiong ka la kut. Ia kane ka jaka theh niut kaba heh 18 akar ha Marten la pyndonkam da ka Shillong Municipal Board naduh ka snem 1938.

Haba kylli, u Bah Dhar u la ong ba na ka liang ka sorkar ka la pyllait ruh ia ka Expression of Interest (EoI) kaba thymmai na ka bynta ka jaka theh niut kaba thymmai ia ka sor Jowai. U la pyntip ruh ba na ka liang ka sorkar ka la dep ban thied ia ka jaka na ka bynta  ka jaka theh niut kaba thymmai na ka bynta ka sor Tura.