Shen yn rai ka Sorkar ban kyntiew kyrdan noh ia ki skul Secondary sha ki Higher Secondary bad sdang lain pule thymmai

Syllad | The Rising MeghalayaApril 22, 2025

Ka Sorkar Jylla shen kan sa shim ia ka rai ban kyntiew kyrdan noh ia ki skul Secondary sha ka Higher Secondary, ban sdang wanrah noh ia ka lain jingpule kaba thymmai bad ban plie noh ia ka jingshim klas kaba thymmai hadien ba la ioh pdiang ia ki jingtyrwa na ki District School Education Officers (DSEO), kiba la ioh ia ka jingbthah ban ai ia ki form rung klas sha baroh ki khynnah pule kiba la pyndep ia ka eksam SSLC mynta u snem.

Ia kane la pyntip da u Director School Education Literacy u Bah Banteilang J Kharshandi ha ka 21 tarik Iaiong hadien ka jingialang ba la khot pynlong da u Commissioner & Secretary Vijay u Kumar Mantri bad ki DSEO bad SDSEO na ka bynta ka jingpynrung klas ne admission sha ka klas XI.

U Bah Kharshandi u la ong ha kaba iadei bad ka jingkyntiew kyrdan ia ki sawtylli ki Government Secondary School sha ka Higher Secondary School, ia kane yn sa shim rai da ka sorkar.

U la bynrap ba halor ka jingpdiang ia ki khynnah pule, ka tnad ka la dep bthah ia baroh ki DSEO ba kin ai ia ki admission from na ka bynta ki lain pule ne stream bapher bapher na ka bynta kito ki jaka puke kiba kwah ban kyntiew kyrdan noh sha ka Higher Secondary.

“Kan shong eh ha ka jingphaikhmat jong ki khynnah pule, ka DSEO kan sa shim ia ka rai la ka jingthmu ban wanrah ia ka lain jingpule bathymmai ha ki jaka pule kiba la don lypa ka long ne em kaba donkam. Kumta ruh haduh lashai ka 22 tarik Iaiong baroh ki jingtyrwa yn sa pynthikna da ki DSEO hashwa ban rah sha ka kynhun Myntri,” ong u Bah Kharshandi haba bynrap, “Hapoh lashai ka sngi 22 tarik hadien ba ki DSEO ki la ioh pdiang ia baroh ki jingtyrwa ban sdang ia ki lain jingpule bathymmai bad ban sdang thymmai ia ka por long klas kaba thymmai, kumta ruh na ka liang ka sorkar kan sa shim ia ka rai lano yn khang noh ia ka jingai admission bad ban sdang ban pynbeit ia ki tarik ban sdang ia ka samoi jingpule kaba mynta.”

U Director u la pyntip ruh ba ka tnad kan sa thung ia ki nonghikai da kaba pynshong nongrim lyngba ka jingpeit bnai h lyngba ki DSEO. Watla katta u la iai ban ba lada don tang 8-10 ki khynnah, kan ym long kaba shong nongrim na ka bynta ka sorkar ba kan sdang ia ki lain jingpule bathymmai bad ban thung nonghikai.

“Kumta ka shong ha ka jingdon bun jong ki khynnah pule, kum ka nuksa, lada ngi ioh kumba 30-40 ngut ki khynnah, kumta ka jingplie ia ki lain jingpule ha ka Science ha kino kino ki Government Higher Secondary School, kumta ia kane ka jingtyrwa lah ban phah sha ngi bad ngin pan ia ka jingmynjur na ka kynhun Myntri bad hadien ka jingmynjur jong ka kynhun Myntri ngin sa iaid shakhmat ban ai ia ki jingbthah sha baroh ki DSEO ba kin iaid shakhmat ban shim ia ki admission, ban iaid shakhmat ia ki jingpule bad ia mynta hi katba ym pat thung pura ia ki nonghikai lah ban thung shwa shipor ia ki nonghikai,” u la ong.

Haba kylli, u Director u la ong ba katkum ki jingtip ba ki la ioh bad haba shim halor ka jingdon jong ki jaka pule ba pyniaid da ki riew shimet, ka jingdon ki jaka pule kan long kaba biang ban pdiang ia baroh ki khynnah kynthup na ka bynta ka jingpynbna ia ka result jong ka CBSE bad ICSE.