Shen yn sdang ka jingpynheh ia ka Shillong Airport ban hiar ki liengsuin ba kham heh: Dy CM

Syllad | The Rising MeghalayaApril 15, 2025

U Symbud Myntri Rangbah ka Jylla uba khmih ia ka Tnad Transport u Bah Sniawbhalang Dhar ha ka 14 tarik Iaiong u pyntip ba ka jingpynheh ia ka kad liengsuin Shillong Airport kan sa sdang noh shen khnang ban pynthikna ba ki liengsuin kiba kham heh kin lah ban wan hiar ha kane ka jaka ha une u snem u ban wan.

Haba kren sha ki lad pathai khubor, u Bah Sniawbhalang u la ong, “Ngi don ia ka khubor kaba sngewtynnad. Ka Airport Authority of India (AAI) ka la khot tender na ka bynta ban pynheh ia ka Shillong Airport bad nga kyrmen ba ha u snem 2026 ngin lah ban sakhi ia ka jingwan hiar ki liengsun kiba kham heh ha kane ka kad liengsuin.”

“Ka jingshim jaka ka la jan dep artad bad shen ngin sa pyndep ia ka jingsiew halor ka bai jaka. Baroh ki kam ki long kiba iaid beit iaid ryntih bad kumta ruh na ka liang ka AAI ka la lah ban khot tender,” u la ong.

Ha ka 5 tarik Iaiong ka AAI ka la pynmih ia ka jingpynbna tender na ka bynta ban pynheh ia ka kad liengsuin Shillong Airport. Kane ka sienjam ka la wan long beit beit lyngba ka jingshimkhia hapoh ka jingialam jong u Myntri Rangbah ka jylla u Conrad uba la kular ban shim ia ki sienjam ban shim kongsan halor ka jingkyntiew ia ki lad pyniasoh da ki liengsuin.

Ka jingpynheh ia kane ka kad liengsuin ka kynthup ia ka jingpynheh ia ka lynti iaid liengsuin ne run way kaba la don lypa 571 mitar bad ka ban kot baroh sha ka 2,400 mitar. Kane kan pynsuk ruh halor ka jingpyniaid ia ki liengsuin kiba kham heh kum ki liengsuin A-320 ha Shillong. Nalor kata kane ka project ka kynthup ruh halor ka jingpynheh ia ka Termial bad ka Apron lem bad kiwei pat ki jingtei. Katkum ka jingpynbna tender ka jinglut jingsep na ka bynta kane ka project kaba heh kan kot sha ka T.11,944.47 lak (T.119.44 klur), bad la khmih lynti ba yn lah ban pyndep ha ki 18 bnai.

Na ka liang u Myntri Rangbah ka Jylla u Conrad K Sangma u la ong, “Kane ka dei ka khyllipmant kaba sngewhun bad ka jingkyrmen kaba khraw ia ka jylla Meghalaya. Ka jingkhot tender na ka bynta ban pynheh ia kane ka kad liengsuin ka dei ka jingmih lyngba ka jingtrei shitom ka jong ngi mynta lah katto katne snem. Ka jingkyntiew ia ki lad pyniasoh da ki liengsuin kam dei satia tang ban pynsuk, hynrei ban wanrah jingkylla ha ka jinglong jingim, ban kyntiew ia ki kam jngohkai, ban khring ia ki nongbei tyngka bad ban plielad ha ka liang ka ioh kam ioh jam na ka bynta ki samla.”

U CM ka Jylla u la shimkhia halor kane ka jingpynheh ia ka Shillong Airport bad ka Sorkar Pdeng ha ki kyrdan bapher bapher. Kane ka project la shim ruh ba kadei u mawjam ka jingangnud jong ka jylla Meghalaya ban kylla long ka jaka jngohkai pyrthei kaba kongsan bad ka jaka na ka bynta ki kam bei tyngka ha ka ri.

Ka AAI ka la aiti ia ka Draft Master Plan na ka bynta ban pynheh ia kane ka kad liengsuin ha u bnai Nailar 2024, bad ka jingshim jaka na ka bynta ka jingpynheh kaba long 22 akar na ka bynta kane ka project ka la iaid shakhmat. Kane ka jingpynheh ia kane ka kad liengsuin la khmih lynti ba kan pyniasoh bad ki nongbah ba pawkhmat ha kylleng ka ri India bad ka ban plielad ha ka jingkiew ka jingwan ki nongshangkai pyrthei, ka leit ka wan ha ki kam khaii pateng, bad ka jingpyniasoh lang ia ki thain jong ka ri.