Shen yn shim rai ka kynhun Myntri ban shimti ka tnad Pule Puthi ia ki nonghikai SSA: MSSASA

Syllad | The Rising MeghalayaSeptember 22, 2024

Ka tnat Pule Puthi ka Jylla shen kan rah sha ka jingialang jong ka kynhun Myntri Sorkar halor ka jingtyrwa ban ai jingithuh noh ia ki 12,541 ngut ki nonghikai SSA ha ka Jylla kum ki nongtrei sorkar.

Ia kane la pyntip da u President ka Meghalaya SSA Schools Association (MSSASA) u Bah Aristotle C Rymbai hadien ka General Executive Council Meeting jong ka Association ha ka 21 tarik Nailur.

“Hadien ka jingiakynduh ka jong ngi ia u Director of School Education and Literacy uba dei ruh u State Project Director ka  SSA u Swapnil Tembe ha ka 10 tarik Nailur, bad hadien ba ngi la iakynduh ia u Commissioner & Secretary u Vijay Mantri ha ka 19 tarik Nailur, baroh arngut ki la pyntip ba na ka liang ka Sorkar Jylla ka la pynkhreh ia ka Cabinet Memorandum na ka bynta ban aijingithuh noh ia ka jingai jingshakri lane ban pyniasoh lang noh ia ki nonghikai SSA na ka State Implementation Society sha ka Tnat Pule Puthi,” ong u Bah Aristotle.

Nalor kata u la ong ruh ba ki mat kiba iadei bad ka jingdawa ban pynkiew tulop bad ban ioh jingithuh noh ia ka jingai jingshakri jong ki nonghikai SSA la iatai sani bha ha kane ka GEC meeting.

“Hadien ka jingiamir jingmut kaba sani kaba la neh jan lai kynta, ngi la rai ban jied ia ka jingioh jingithuh ia ka jingshakri ka jong ngi bad ngit la rai ban rah ia kane ka mat ha ka general meeting jong baroh ki nonghikai SSA ha Meghalaya ia kaba yn pynlong ha u bnai Risaw u ban wan ha Madan Students, Jaiaw,” u la ong.

“Kumta ngi kyrpad ia baroh ki nonghikai SSA ba kin ia wan sha katei ka jingialang khnang ba ngin lah ban shim ia ka rai kaba khatduh ha kaba iadei bad kane ka phang,” ong shuh shuh u nongialam ka Association.