Shen yn thung ka Sorkar haduh palat 1000 tylli ki kam nonghikai ha ki skul bad college haka Jylla

Syllad | The Rising MeghalayaDecember 12, 2024

Ka Sorkar Jylla shen kan sdang ban pynkhreh noh ia ki sienjam ban thung haduh palat 1000 tylli ki kam nonghikai ha ki skul bad ki college Sorkar bapher bapher ha kylleng ka Jylla.

Haba pyntip ia kane ha ka 11 tarik Nohprah, u Myntri ka Tnad pule puthi, u Rakkam A Sangma u la ong, “Ha kine ki shi bnai ban wan, ngin sa khot ia ka jingpynbna laitkam kaba haduh palat 1000 tylli ki kam hikai ha ka Tnad pule puthi, kata naduh ki Higher & Technical Education, College bad Higher Secondary, Secondary bad Primary School”.

“Ha kine ki ar bad lai taiew ban wan ngin sa pynmih ia ka jingpynbna na ka bynta ban pyndap ia baroh kine ki kam kiba lait,” u la bynrap.

U Myntri u la ong ruh ba ka jingshim rai jong ka Sorkar ban sdang noh ia ki Science stream ha ki santylli ki college bad Commerce stream ha ki laitylli ki college ka la lam sha ka jingpynmih ia kumba 248 tylli ki kam.

“Shen ngin sa pynmih ia kane ka jingpynbna laitkam khnang ban pynthikna ba kine ki course kin lah ban sdang noh ha ka snem pule ka ban wan,” u la ong.

Kumjuh u Myntri u la pyntip ruh ba ka jingthung ia u Vice Chancellor jong ka Captain Williamson Sangma State Univeristy la lah ban pyndep.

“Ngi kwah ban sdang ia ki katto katne ki post graduate course naduh ka snem pule ka ban wan.Kumta ruh ka University kan sa khot mardor na ka bynta ka jingthung kam,” u la bynrap.