Shi khung ki jingdawa buh ki heh shnong ha khappud & Block-I; dawa Police Outpost ha Psiar

Syllad | The Rising MeghalayaMarch 9, 2019

SHILLONG:  Ki san tylli ki Dorbar Shnong kiba don ha khappud bad ha Block I ki la dawa ban buh mardor ïa ka Police Outpost ha Psiar ne Mowluber bad ban kyntiew kyrdan noh ia ka Raliang Outpost sha ka Police Station ban ai jingïada ïa ki paid Khasi Pnar kiba shong basah ha khappud Meghalaya Assam.

Kitei ki san tylli ki Dorbar Shnong ki long Tum Tum, Khatkasla bad Psiar kiba hap hapoh u pud u sam jong ka West Jaiñtia Hills District bad artylli pat kiba hap hapoh Block-I kata ka Mowluber bad Moojem ki la leit ai ia ka dorkhas ia u Deputy Chief Minister Bah Prestone Tynsong ha Secretariat haka sngi Thohdieng.

Ki la dawa na ka Sorkar ban shna noh ia ka surok ban pyniasoh ïaka Shnong Sahsniang sha Khatkasla ter ter sha Psiar bad sha Mowluber sha Mowjem bad shaduh Madan Nongkylla. Nalor kata ki la dawa ban seng noh ia ki skul bad jaka pule khnang ban ai jingnang jingstad ia ki khynnah kiba shong basah ha ki shnong ha Block-I.

Ki Dorbar Shnong ki la dawa ban ai bording noh sha ki shnong Mowluber Skap, Shnong Thymmei,  Mowjem shaduh Madan Nongkylla kiba hap ha Block-I bad ki bynniaw ba ki shnong Karbi marjan ki la ioh bording lut hynrei ma ki pat ki dang iashong ha  jingdum.

Ki la dawa ban pynbeit mardor noh ïa ka jingiakajia khappud hapdeng Assam bad Meghalaya. Namar ka jingiakajia pur, ki hap ban mad ia ki jingeh bad jingsahdien ha baroh kiliang haduh mynta namar ka Assam ka kam trai ia kitei ki shnong ha Block I tang ha jingthoh ym ha ka kam bad ka Assam ka tip shai ba kitei shnong ki dei jong ka Meghalaya te kumta kam shym leh kino kino ki kam pynroi.

Katkum ka dorkhat bala ai sha ka Sorkar la kyntu ban shah noh ban bteng ia ka jingtei jong ka Mowluber Lower Primary SSA School kaba la shah ban pynsangeh da ka Sorkar Assam mynshem snem bad ban kyntiew kyrdan ia ka sub centre ha Psiar sha ka Primary Health Centre khnang ban ai jingsumar sukher ia ki nongshong shnong.

U Bah Tynsong u la kular ba ka sorkar kan shimkhia ban peit iakajingdawa bad ha kaba iadei bad ka jingdawa jong ki ban buh Outpost ha ka Shnong Psiar, ruh ula kyrpad ia ki ban iaishah haduh da kut kane ka Budget session.