ASSA: Shi point tam ka Amlarem haka Super League, ka Upper bad Lower Div kila jam sha ka semifinal & final

Syllad | The Rising MeghalayaDecember 5, 2023

Ka Amlarem Social Club ka la wan haka kyrdan kaba hakhliehduh haka miej iakhein point da kaba kamai 14 point na ki 7 tylli ki jingialehkai, kata saw sien jop, ar sien iakhaid bad rem shisien haka lympung ialehkai Super League Football Tournament kaba pyniaid da ka Amlarem Sub Divisional Sports Association (ASSA).

Ka Jarain SCC 13 point, Seinbhalang Shkentalang bad ka Dongmihsngi Mupyut mar 11, ka Youth Club Pdengkarong 8, ka Man-i-bha 5, ka Umladkhur 4 bad ka Thangbuli 3.

Kane ka lympung kala jan jam noh artad sha ka semifinal,ka dang sah ar tylli ki jingialehkai ban pyndep, kata ka long hapdeng ka Seinbhalang Shkentang pyrshah iaka Pdengkarong, ka Man I bha bad ka Umladkhur SC.

Haba phai sha ka jingialehkai haka sngi Nyngkong ha Ladjaplem, Amlarem, ka Jarain C&SC kala iakhaid bad Dongmihsngi Mupyut mar 1-1. Ka Jarain kala ioh pynkhih iaka jar haka minit kaba 28’ lyngba Johnsing Mukhim. Na kaliang ka Dongmihsngi Mupyut kala lah ban tan kylla iaka jingialehkai sha kaba iakhaid lyngba u Iaishah Khongmuloh haka minit kaba 70’.

Haba phai pat sha ka Lower Division Football Tournament, kane ka lympung kala jam noh sha ka final ha kaba ka YFC Trangblang SC bad ka Namrhen Ryntih Kudengrim kin iaknieh iaka nam lahduh haka 15 tarik une u bnai.

Ka resol na ka jingialehkai semifinal, ka YFC Trangblang ka la pynliem da 9-8 iaka Amlanai TC lyngba ka iashut Tie Breaker. Ka Namrhen Ryntih Kudengrim ka la pynliem da 1-0 iaka Shnongpdeng lyngba ka kol kaba la thep u Maitshaphrang Talang haka minit kaba 50.

Haka kyrdan Upper Division Football Tournament ka jingiakhun semifinal kan long mynta ka sngi, 5 tarik Nohprah, hapdeng ka Sohlawiat SC pyrshah iaka Lumpynngad SC bad ka Syndai Kmai Shnong pyrshah iaka Pamtbuh SC.