Shi taiew ai por ka HYC ia ka sorkar ban kyndang ia kiba shong beian ha Lum Survey

Syllad | The Rising MeghalayaMay 3, 2024

Ka Hynniewtrep Youths’ Council (HYC) ka la ai por shitaiew ia ka sorkar ba kan pynlong ka jingleit tohkit bad pynthikna bad ban pynher krad ia ki briew kiba shong ba sah beain ha Lum Survey pyrshah ka Tnat Fire Emergency Services, Shillong.

Haba kren sha ki lad pathai khubor haka 2 tarik Jymmang, u President ka HYC u Bah Roykupar Synrem u la ong ba ka jingshim ia kane ka rai ka la wan long hadien ba ki bor pyniaid district ki la pynpaw halor ka jingbym lah ban shim ia ki sienjam ban kyndang noh ia kine ki briew kiba shong beain ha kane ka jaka halor ka nongrim ba kane ka jaka ka dei kaba don hapdeng ka jingiakynad bad ka jingialeh mukotduma hapoh ka iingkashari.

 “Ha ka jingtohkit ka jong ngi, la ioh jingtip ba ki don laitylli ki mukotduma kiba dang sahteng hapoh ka iingkashari u District Judge, Shillong ha kaba iadei bad ka hukum phah mih noh ne Eviction Notice ba ia ki laingut ki riew shimet kiba shong ha ki bynta jong kane ka jaka (kaba heh kumba 200 haduh 500 sq ft kawei) hapoh ki kyndon jong ka Section 5 of the Public Premises (Eviction of Unauthorised Occupants) Act, 1971 da u Estate Officer, Guwahati.

 “Ngi la iakynduh ruh ia uwei napdeng kine ki briew uba la ioh ia ka Notice uba la ujor mukotduma pyrshah ia kane Eviction Notice ha kaba u la pynshai ha ngi ba kane ka jaka kaba ka jingialeh mukotduma ka dang sahteng ka dei kaba tang khyndiat eh ka jaka bad kam kynthup ia ka bynta kaba bun ka jaka kaba pyndonkam da kine ki briew kiba shong beain. Kumta ka jingkylli kaba iadei bad ka jingialeh mukotduma kam don satia ha kaba iadei bad kane ka jingdawa ban kyndang ia kine ki briew kiba shong beain da ki bor sorkar ba dei khmih,” bynrap u nongialam ka HYC.

Kumta halor kane ka bynta u Bah Synrem u la ong ba ka Seng ka la phah da ka jingthoh sha u Deputy Commissioner ka East Khasi Hills, sha u Defence Estate Officer, Guwahati bad kiwei pat ki tnat sorkar ba dei khmih ban pynshai bad ban pynkloi ban leh ei ei pyrshah ia kine ki briew kiba shong beain ha katei ka jaka lym kumta ka Seng kam don lad da kumwei pat hynrei ban pynlong hi ia ka jingleit tohkit bniah ha ryngkat ki nongmudui mukotduma nalor ki lad pathai khubor na ka bynta ka bha ka miat jong ki paidbah ba bun balang, ong u Bah Synrem.

Lah ban kdew ba ka Seng HYC ha ka 25 tarik mynta u bnai ka la pynlong ka jingleit jurip bad lap ba ki don haduh kumba 80-100 tylli ki longiing kiba shong beain ha Lum Survey, kata khlem kano kano ka jingioh jingmut na ki bor ba dei khmih.