Shikhung ki motion wanrah ka BJP kynthup ïaka thungkam beaiñ haka Dorbar Tlang JHADC

Syllad | The Rising MeghalayaNovember 27, 2019

JOWAI: Ki MDC jong ka Bharatiya Janata Party (BJP) kiba don haka liang pyrshah kila long kiba pynkhreh ban wanrah ïa ki bun tylli ki mat ïakren (Motion) haka Dorbar Tlang kaban long haka 28-29 tarik u Naiwieng halor ka jingbym lah jong ka Executive Committee (EC) kaba ïalam da u Ma Thombor Shiwat kum u Chief Executive Member (CEM) jong ka Jaiñtia Hills Autonomous District Council ban pyntreikam.

Ki MDC ka BJP kaba kynthup ïa u Ma Lakhon Biam, Krison Langstang, u JTreilang Suchiang bad u Dawan Lyngdoh kin wanrah ïaki motion haduh 7 tylli ban shimkhia ka executive committee ban pyntreikam ban myntoi ka konsil bad u paidbah.

U ma Lakhon Biam un wanrah ar tylli ki motion, kata halor ka jinghiran ka a ïoh ka kot jong ka konsil kaba la ktah ïaki nongtrei ka konsil bad ki kam pynroi ka konsil. Kawei pat ka motion kadei halor ka jingthungkam beaiñ hapoh ka konsil ha ki post bapher bapher bad kaba la thung ka jingtohkit, hynrei ïaka kaiphod haduh mynta ka ka EC kam pat la ban pynmiih naduh u bnai Naitung 31.

U Ma Krison Langstang pat un wanrah ïaka motion halor ban pynkhie im biang ïaka Khliehriat Town Committee.

Shuh shuh u ma J Treilang Suchiang, un wanrah ka motion halor ka jingsangeh ka jingpyntrei ïaka Iawmusiang kaba thymmai nbad kawei pat ka jingdawa ban pynkylla ïaka rukom treikam jong ka Revenue and Land Reform Department naka Manual System sha ka Digital system.

U Ma Dawan Lyngdoh u MDC ka Mynsngat Khanduli, un wanrah ïaka motion halor ka jingphiel jong ka konsil ban ai ïaki Land Holding Certificate sha ki trai jaka haka por kaba biang bad kawei pat ka mat ka dei halor ka kam registration ïaki jaka puta ha ki jaka khappud bad u ne u MDC u angnud ban wanrah kum ka mat iakren ba kan long aiñ khnang baka konsil kan register iaki jaka puta khlem da shim dor eiei ïaki jaka kiba don ha khappud jong ka Jaiñtia Hills bad ka Assam.