Shim bynta u CM Conrad haka jingplie ia ka Parliament ba thymmai ha Delhi

Syllad | The Rising MeghalayaMay 28, 2023

Ka jingplie ia ka Parliament thymmai da u Myntri Rangbahduh ka Ri, u Narendra Modi ha kane ka Sngi U Blei, ka ban sahnam ha ka lynti iaid jong ka Riti synshar laitluid jong ka ri India.

Katei ka jingtei ba pawnam ka dei ruh ka dak ka jingthrang jong ki 144 billion ki nong India kum ka dak ka jingkiew arted, ka jingiatylli bad ruh ka jinglong kawei salonsar. Kane ka Parliament ba thymmai kaba la tei katkum ka juk mynta kaba lah ban ngiam haduh 888 ngut ki dkhot ka Lok Sabha, ka buh thong ruh ban ai ka jingshakri kaba paka bad pynkhlain ruh kumno ban shim ia ki rai ba iadei bad ka riti synshar laitluid.

Halor kane ka sngi khraw, na ka liang u Myntri Rangbah ka jylla Conrad K Sangma u la ong, “Kum uwei na kiba ioh ban sakhi lang ia kane ka sngi ba khraw, nga dap da ka jingkmen halor ka jinglah jong ka Ri jongngi. U nongialam jong ngi, u PA Sangma ba dei ruh u Lamphang barim ka Lok Sabha, u la ju iohi lypa ia ka thain shatei lam mihngi ba kan don lang ryngkat ryngkat bad kiwei pat ki bynta jong ka Ri. Mynta ka sngi, nga sakhi ia ka jingplie ia kane ka projek sahnam, nga kynmaw ia ka jingiohi jngai bad ruh ia ka jingpyrshang borbah jong u. Ka jingangnud jong ka ri jongngi ia ka synshar ba laitluid bad kaba kdup ia ka lawei kaba phyrnai ka la phalang lypa da kane ka Parliament ba thymmai. Kadei ka jutang ia ka lynti iaid jong ka India bad ruh ka jingskhem jong ka ban ai ia ka synshar khadar kaba long salonsar ia baroh.”

Ka jingplie ia katei ka Parliament ba thymmai ka pyni ruh ia ka jingiaid shakhmat na ka bynta ka synshar laitluid ha ka ri baroh kawei. Ka kdew ruh ia ka thong jong ka ri na ka bynta ka kiew bad ka roi ka pa ha baroh ki liang. Kumba ka India ka nang kiew arted, ka Parliament ba thymmai kan long kum ka dak ka jingai mynsiem bad ka rynsan na bynta ki jingiasyllok kiba seisoh, bad ailad ia ki nongialam ka Ri ban thaw ia ki polisi kiba lah ban aibor bad pynkupbor bad ruh ban kynriew ia ka jingim jong ki nongshong shnong jong ka.