Shim jingkitkhlieh ka HNLC halor ka jingbthei bom IED ha Them Metor, ai por shi bnai ban pynkynriah ia ki Harijan

Syllad | The Rising MeghalayaMarch 14, 2024

Ka Seng kieng atiar Hynniewtrep National Liberation Council (HNLC) ka la shim ia ka jingkitkhlieh ha kaba iadei bad ka jingjia pynbthei bom IED kaba la jia ha ka miet 9 tarik mynta u bnai ha Them Metor, (Iew Mawlong), bad ai por shi bnai ban pynkynriah noh ia ki jaidbynriew Harijan na kane ka jaka.

Ka HNLC ka la ong ruh ba ka kynhun Budnar Shadow Squad (BSS) kaba treikam kum ka tnat ba kyrpang jong ka, ka dei kaba donkti ha katei ka jingpynbthei bom.

Na ka liang u Bah Sainkupar Nongtraw, General secretary cum Publicity secretary ka HNLC lyngba une u kyrwoh u la ong, “Ka sorkar MDA bad ka Tnat Pulit ki la kyndit ban shem ba ka kynhun jong ngi ka la lah ban leh ia kaba kum kane ka kam thombor ha ka jaka ba jur ka jingpahara. Ngim shym la don jingthmu ban ktah ia ki riew paidbah ne ki mynsiem ba lui lui, kumta ngi la shim ia ki sienjam ban kiar. Ka long kaba donkam ia ka sorkar ba kan weng noh ia ki bor pahara CRPF napoh them Metor khnang ban pynthikna ia ka jinglaitluid ha ka leit ka wan jong ki khun Hynniewtrep ha kane ka jaka.”

 “Namar ka jingpynslem jong ka sorkar jylla ban pynkynriah noh ia ki jaidbynriew Harijan na kane ka jaka, ngim don da kiwei pat ki lad hynrei ban pyni da ki kam. Kane ka dei tang ka jingpynkynmaw ba rit ba lada ka sorkar ka pulom ban aijingiada ia ki briew jong ngi, ngin sa sakhi ba ka bri u Hynniewtrep kan sa poi sha ka thma kam pohiing.Kino kino ki jaidbynriew kiba buh jingma ia u khun Hynniewtrep kin ngat ha ka jingeh.”

Ka HNLC ka la ong ruh, “Ki Pulit ki la don ha ka thma bad ki briew ki jong ngi, bad ngin iada ia la ka jong ka jaka puta bad ki briew jong ka da kaba shim da kino kino ki lad ki lynti. Ka Tnat kam pohiing ka Jylla ka dei kaba la pyniaid da ki briew kiba na bar Jylla, bad ki heh pulit kiba dei ki Khasi ki la shah pynlong kum ki ksew beh.”

Nalor kata ka HNLC ka la ong ruh ba u Bah Prestone bad u Sniawbhalang ki la shah pyndonkam ha ki nongialam Garo, u Mukul Sangma bad u Conrad K Sangma, kata nyngkong ha ka Congress bad mynta hapoh ka NPP.”

 “Ngi la sakhi halor kane ka jingdon ba la slem bah jong ki jaidbynriew Harijan hapoh kane ka Bri u Hynniewtrep. Ngim shym la kyntu ia phi ban mih noh napoh ka Bri u Hynniewtrep. Ka jingthmu ka jong ngi kam dei satia ban pynshit halor ka jingiapher jaidbynriew, hynrei ngi pynshlur ia ki Harijan ba kin leit shong noh sha ka jaka ba la pynkhreh da ka sorkar bad ban mih noh ma Them Metor. “Ha ki snem kiba la leit noh ngi la shim ia ka jingim jong uwei na ki dkhot jong phi, u Lal Singh namar ki kam pyntriem ki ba u la leh bad kaba la ktah ia ka jingsngew jong ki paid nongshong shnong jong ngi.”

Shuh shuh ka HNLC ka la ong ba kane ka dei ruh ka khubor sha kino kino ki bar jylla kiba shong ba sah hapoh kane ka Bri u Hynniewtrep “La pdiang sngewbha ia phi ban shong hangne, hynrei kiar na kaba kam trai ia ka jaka ka jong ngi, kiar na ki kam pyni bor bad ki kam ia aireng pyrshah ia ngi lane ban pynbitar ia ngi, bad lada ym lah ban leh kumta phin ngat ha ka jingeh, namar u nongtuh un ym lah ban long u trai.”