Shim ka Meghalaya Assembly iaka sienjam ban sangeh pyndonkam kot sada ha dorbar

Syllad | The Rising MeghalayaFebruary 5, 2024

U nongïalam ka liang pyrshah u Bah Ronnie V Lyngdoh u la ong ba u ai jingkyrshan pura halor ka jingpyndonkam ïa ka National eVidhan Application (NeVA) ban buh rekod ïa ki jingïakren ha ïingdorbar thaw aiñ Meghalaya Legislative Assembly kiba ryntih bad khlem ka jingpyndonkam shuh da ki kot sada hapoh ka iing dorbar

Une u nongïalam ka liang pyrshah u la ïoh jinghikai haka 5 atrik Rymphang, ban pyndonkam ïa ka NeVA na ki heh ophisar jong ka IT Cell ka ïingdorbar thaw aiñ secretariat ka jylla Meghalaya ha Conference Hall ha Administrative Block ka dorbar thaw aiñ kaba don ha Khyndailad,Shillong.

Na ka liang u Lyngdoh, u la ai jingïaroh ïa u Lamphang ka ïingdorbar thaw aiñ, u Thomas A Sangma, bad ki heh ophisar jong ka ïingdorbar thaw aiñ Secretariat halor ka jingshimkhia bad shim kane ka sienjam ban pyndonkam da ka National eVidhan Application. U la kdew ba kane ka sienjam kadei kaba lah ban ai jingmyntoi shibun na kabynta ka sawdong sawkun.

Kumjuh ruh u la kdew halor ka jingsuk ban pyndonkam ïa kane ka Apps namar ka dei kaba lah ban phah ki jingkylli bad ki jingpyntip lada don ha kano kano ka jaka ruh.

Lah ban kdew hangne ba kane ka Apps ka dei kaba la mang kyrpang na ka bynta baroh ki dkhot ka ïing halor ka jinglah ban phah ki jingkylli bad  kiwei de ki jingpyntip.

Ka NeVA,  ka dei kaba la pynrung ha ka NIC Cloud MeghRaj, ka dei kaba lah shna pynwandur ban pynsuk halor ka jingbuh ki mat jingïakren da u Shongknor ka ïing, bad pyndep ki kam ba ïadei bad ka dorbar thaw aiñ khlem da donkam shuh ban pyndonkam ki kot sada bad kumjuh ruh kan ai jingïarap ïa ki dkhot ka ïing ba ki lah ban pyndep ïa la kajong ka kamram wat ha la ïing la sem lajong.

Ka NeVA ka dei kaba la shna pynwandur khnang na ka bynta ki dkhot ka ïingdorbar ba ki lah ban buh baroh ki jingtip  ba kynthup naduh ki  jingtip bal ah ban ïakren  bad ki dkhot ka ïing, ki kyndon treikam, ki jaitkam bapher bapher, ki jingpyntip, ki khubor, ki jingsiew ne ki bill, ki jingkylli kiba kham donkam bad kiba ym da donkam palat bad ki jubab, ki kaiphod ka komitee napdeng kiwei de tang hapoh ki phone ne ki tablet bad lah ruh ban sam lang sha ki tnad treikam bapher bapher. Ka NeVA  kan pynduh noh shisyndon halor ka rukom phah jingtip/ kyrpad halor ka jinglum jingtip ha kaba ïadei bad ki mat treikam bapher bapher.