Shim ka Sorkar ia ki sienjam ban pynim biang ia palat 741 tylli ki tyllong um ha ka Jylla

Syllad | The Rising MeghalayaFebruary 25, 2025

Ka sorkarJylla ka la shim ia ki sienjam ban pynim biang ia palat 741 tylli ki tyllong um kiba kongsan ha kylleng ka jylla kiba la tyrkhong namar ka jngshah ktah na ka jingkylla ha ka suinbneng.

Haba kren sha ki lad pathai khubor, u Myntri ka Tnad Public Health Engineering (PHE) u Marcuise N Marak u la ong ba kane ka jingtyrkhong jong ki tyllong um ka don ia ka jingiadei bad ka jingshah ktah na ka jingkylla ha ka jinglong jingman jong ka suinbneng.

“Ka jingkylla ha ka suinbneng ka la jia ha kylleng ki jaka. Dang shen, kata ha ka 18 bad 19 tarik Rymphang ngi la shong ia ka jingialang kaba ar jong ka All India Water Ministers Conference ha Udaipur ha kaba nga la ioh sngew na ki Myntri sorkar na kylleng ki jylla ba kane ka jingktah ka la jia sha kylleng ki jaka. Ka dei ka jingshah ktah na ka jingkylla ha ka suinbneng. Ka dei ka jingktah na ka jingkylla ka suinbneng. Hooid, ngi la sdang ban shim ia ki lad ki lynti ban ialeh pyrshah ia kane ka jingshah ktah bad ngin sa ioh ia u soh ha kine ki khyndiat snem ki ban wan. Ngi la sdang ban pynim biang ia ki shyngiar bad ki tyllong um kiba la tyrkhong,” u la ong.

U Myntri u pyntip ruh ba ka Tnad ka la dep ban ithuh dang shen ia palat 741 tylli ki tyllong um kiba don jingma na ka jinglah ban duhjait noh.

“Hapoh ka jingialam jong u Myntri Rangbah ka Jylla u Conrad K Sangma, ka Meghalaya ka la thaw ia ka Climate Council kaba la shim ia ka rai ban shim ia ki lad ki lynti na ka bynta ban pynim biang ia kine ki tyllong um,” u la bynrap.

Haba kylla, u Marak u la ong ba ka jingtyrkhong jong ki tyllong um ka la ktah shibun ha kaba iadei bad ka jingpyntreikam ia ka project Jal Jeevan Mission (JJM).

“Ha kino kino ki shnong ki bym ioh um ka daw hi ka dei namar ba ki tyllong um ki la tyrkhong. Ngi la shim ia baroh ki sienjam ban weng ia kine ki jingeh,” u la ong.

U la kam ruh ba ka daw ba kongsan jong kane ka jingring tyrkhong ki tyllong um ka dei namar ka jingrep syrti khamtam eh ha Rilum Garo bad ki katto katne ha ki bynta jong ka West Khasi Hills.

Ha kaba iadei ba ka slogan jong ka sorkar India, “Kem ia u slap haba u hap,” u Marak u la ong, “Kumta ruh ngi la bud ia kane ka nongrim bad ngi la pyrshang ban pynim biang ia ki wah ki jong ngi kumjuh ia ki tyllong um.”

U la ong ruh ba ka Sorkar ka la ban jur ruh halor ka jingdonkam ban pynlang bad tyngkai ia ka um slap hapoh ka jylla.

“Ngi don ia ka jingthmu ban pyntreikam ia ki sienjam ban pynlang ia ka um slap.Ia kane lah ban leh ha ki ar bynta, kawei ka long ban pynshlur ban pynlang ia ka umslap ha la ki jong ki iing ki sem bad kawei pat ban pynkhie im biang ia ka um kaba don shapoh khyndew,” ong shuh shuh Myntri.