Shim kabu ki runar ban tuh ban thiem naka khangdam ha Jowai ioh rong ka mar ba shongdor T.2 lak

Syllad | The Rising MeghalayaJune 28, 2021

Ki runar kiba ym lah satia ban ithuh kila shim kabu iaka jingkynjah ka shnong ka thaw na ka jingkhang dam COVID-19 bad ka curfew miet bad kila kyndang ia kawei ka dukan ha iew Iawthymme, Ladthadlaboh Jowai bad kila ioh ban rongtuh ka mar ba shongdor haduh T.2 lak.

Kane ka jingjia la suba ba kala jia haka miet Saitjain ha kawei ka dukan kaba dei trei ka Elda Meri Pyrtuh ba shong ba sah ha Tyndonwapung, Jowai. La iathuh ba haduh 7 byrni u kwai ba shongdor T.2 lak nalor kiwei kiwei ki mar bam kala shah rongtuh ha ki runar kiba ym lah satia ban ithuh.

Ka Riloom Jaintia Traders Association (RJTA) lyngba u President Rangbah jong ka U Paila Kordor Lyngkot ula pynpaw iaka jingsngew khia halor kane ka kam tuh thiem ha ki iew ki hat.        

Ka RJTA kala dawa na ki bor ba dei peit ia kane ka iew Iawthymme ba kin shim khia ban pynbiang bor ap pahara ban lait na kum kine ki jingjia kiba ktah iaki nongkhaii namar ba kane ka kam tuh kam thiem ka jia napor sha ka por ha katei ka iew.

Kane ka kam tuh kam thiem Ladthadlaboh kam dei ka sien kaba nyngkong bad bun kiwei pat kiba ym shym la report ki dei kiba shah kyndang ki kali bad kila shah tuh tape kali kumjuh ki battery kali.

Dangshen ha Riatmoolain, Ladthadlaboh ruh kawei ka kali kaba sangeh ha surok kala shah tuh battery kali. U trai ka kali um bna eiei, hynrei ynda ula pynmeh iaka kali kam start bad ynda ula plie iaka bonnet ka kali la lap bym don battery shuh.