Shim rai ka Sorkar ban thaw sa 3000 tylli ki Anganwadi Centre 

Syllad | The Rising MeghalayaSeptember 5, 2023

U Bah Paul Lyngdoh Myntri ka Tnad Social Welfare haka sngi ba Ar u la ong ba na ka liang ka sorkar jylla ka la shim ia ka rai ban pyniar shuh shuh sa 3000 tylli ki Anganwadi Centre ha ka Jylla na ka bynta ban pyntreikam ia ka Meghalaya Childhood Early Development Mission.

Ia kane une u Myntri u la pynpaw haba kren ha ka jingialang ba la khot pynlong da ka Meghalaya Early Childhood Development Mission Society (MECDMS) hapoh Windermere ha ka shnong Umpling.

U Bah Paul haba kren sha ki lad pathai khubor u la ong ba haduh palat 60,000 ngut ki khynnah ha kylleng ki Anganwadi Centre kila shah kynthup ha kane ka mission. U la ong ruh ba ka jingthmu jong ka mission ka long ban wanrah ia ki lad jingpule khnang ba ki Anganwadi Centre kin ym long  tang ki jaka na ka bynta ban sam ia ki jingbam tei met.

Une u Myntri u la ong ruh ba ha ka bynta ba nyngkong yn pynkha kumba 3000 tylli ki centre khnang ban lah pynsted ia ka jingtreikam ka mission ha kine ki centre, hynrei haduh kaba kut jong kine ki  san snem la buh  thong ban kynthup ia baroh ki shnong kiba don hapoh ka Jylla.

Nalor kata u la ong ruh ba ka jingiakren hapdeng ka sorkar jylla bad ka Asian Development Bank na ka bynta ban pyntreikam ia ka Mission ka la long kaba iaid beit iaid ryntih kat haduh mynta bad la thikna ba kin sa iatreilang na ka bynta ban aijingtip hadien ba la soi ia soi ia ka MoU.

Shuh shuh haba pynpaw ha kaba iadei bad ka MCEDM bala pyllait ha u snem ba la dep ka dei kaba nyngkong eh hapoh ka Ri, u Bah Paul u la ong ba kane ka dei ka sienjam ba la shim da u Myntri Rangbah ka Jylla Conrad K Sangma uba la shimkhia ia ka thong jong u Myntri Rangbahduh ka Ri ha kaba ka la don ka jingiasyllok bad u halor ka thong jong ka Mission  ban kyntiew ia ka jingkhie jingsan jong ki khynnah da kaba phaikhmat ruh khamtam halor ka bor pyrkhat pyrdain kumjuh ha ka jingsan jong ka met ka phad.