Shim ram ka Sorkar India $50 million ban iakhun ia ki jingkylla ha ka suinbneng ha Meghalaya

Syllad | The Rising MeghalayaDecember 6, 2024

Ka Sorkar India bad ka Asian Development Bank (ADB) ha ka 5 tarik Nohprah ki la iasoi soskular ban shim ia ka ram kaba kot $50 million na ka bynta ban shna ia ki jaka pynlang um bad kyntiew ia ki lad ban ioh ia ka um bam umdih bad weng ia ki jingeh ki nongshong shnong namar ka jinglah ban shah ktah ha ki jingkylla jong ka suinbneng ne climate change ha Meghalaya.

Kiba la iashim bynta ha kane ka jingiasoi soskular shim ram na ka bynta ka Climate-Adaptative Community-Based Water- Harvesting Project ha Meghalaya ki kynthup ia ka Juhi Mukherjee, Joint Secretary ka Tnad Economic Affairs, Ministry of Finance ka Sorkar India bad ka Oka, Country Director ka ADB’s India Resident Mission jong ka ADB.

Hadien ba la iasoi ia kane ka sokular shim ram, ka Mukherjee ka la ong ba kane ka project ka iahap bha bad ka Meghalaya State Water Policy (MSWP) 2019, kaba thmu na ka bynt ka roi ka par kaba neh, ka jingpyniaid bad ka jingpyndonkam ha ka rukom kaba dei ia ki tyllong um lyngba ka jingiashim bynta lang, ban pynduna ia ka jingma na ka jingshah ktah bad ban kyntiew ia ka rukom tyngka ia ka um.

“Nalor ka jingbei tyngka, ADB kan don bynta ruh ha ka ban iarap ia ka jylla ha ka jingpyntreikam ia ka MSWP bad ban btin lynti ha kaba shim ia ki sienjam ha ka ban plan ia ki lad ki lynti katkum ka jinglong ka suinbneng ban tehlakam ia ka jingkyrduh um.Kane kan kynthup ia ka jingpynwandur ia ka Water Harvesting System (WHS) na ka bynta ban kyrshan ia ka rep ka riang, ka kam ri dohkha, thungsoh bad syntiew, ka jingsam umbam umdih bad kiwei kiwei ki lad kamai na ka bynta ka roi ka par,” ong ka Oka.

Ka project kan iarap ruh ban pynwandur ia ka plan ba kongsan jong ka WHS ha ka jylla baroh kawei da kaba pyrkhat ia ki jaka um kiba rit bad ki sienjam ban weng ia ki jingma na ki jingjia ba sngewsih.Kane kan ialam ban thaw ia ki plan ban pynneh pynsah ia ki um ki wah ha ki kyrdan jong ki shnong ki thaw ban pyniaid da ki bor treikam jong ki Village Employment Council, Watershed Management Committees bad Water Users’ Associations.

Kumjuh kane ka project kan kyrshan ia ka jingtei ia ki 532 tylli ki jaka pynlang um ha baroh ki 12 tylli ki District ka Jylla.Yn pynwandur ia kine ha ka rukom kaba kin lah ban ialeh pyrshah ia kano kano ka jingkylla ha ka jinglong jong ka suinbneng bad ban lah ban pynlang ia ka um haba jur slap bad haba don ki jingshlei um ha ka aiom lyiur. Kane ka um kaba pynlang kan iarap pat ban pynioh ia ka umbam umdih ha ka por ba ring tyrkhong ha ka suinbneng.

Nalor kata kane ka project kan pynroi ia ka command area kaba ha ka jingheh kaba haduh 3000-hectare na ka bynta ban pynbiang um sha ki jaka rep na ka bynta ki nongrep, bad kan thaw 50 tylli ki Weather Station na ka bynta ban lum bad peitngor ia ki jingtip jong ka jinglong ka suinbneng bad ki rukom pynoi um sha ki jaka rep ha ki thain ka Rilum Garo bad Khasi Jaintia.Ka projek kan pynlong ruh ia ka jingpyrshang na ka bynta ka bording micro-hydropower ha ki lai tylli ki WHS.

Ka ADB kan iarap ban pynkhlain ia ka bor jong ka Meghalaya State Watershed bad Wasteland Development Agency bad ka Tnad Soil and Water Conservation ha ka jingpynlang um, ka jingpyntreikam bad jingpyniaid kam. Nalor kata kane ka project kan aijinghikai ruh ia ki nongrep khamtam ia ki kynthei ba kin lah ban kyntiew ia ka jingpynmih na ki jaka rep ba pynpoi um kum ha ka rep soh, syntiew bad ha ka kam ri dohkha.