Shim shuti u Vice Chancellor ka NEHU hadien ka hukum tohkit ka Ministry of Education

Syllad | The Rising MeghalayaNovember 15, 2024

U Vice Chancellor ka skulbah North Eastern Hill University (NEHU) u Prof PS Shukla haka 15 tarik Naiwieng u la shim da ka shuti kaba 13 sngi kaba sdang naduh ka 15 haduh ka 29 tarik Naiwieng 2024.

Ha ka shithi sha u Registrar ka University, u Prof Shukla u la ong, “Na ki daw ki bym lah kiar, Nga la mih na ka Campus da ka shuti Earned Leave (EL) naduh mynta ka 15 tarik u Naiwieng 2024.”

U VC u la ong ba ka shuti ba u la shim kan long naduh ka 17 tarik haduh ka 29 tarik u Naiwieng 2024 bad kaba lah ruh ban pynjlan shuh shuh lada donkam. U la ong ruh ba ha ka jingbym don ka jong u, u Professor uba rangbah tam ka skulbah u Prof N Saha lane  kiwei kin shimti bad khmih ia ki kam jong u Vice Chancellor.

Kane ka jingshim rai ka jong u ka la wan long ruh hadien ba ka Ministry of Education ka Sorkar Pdeng ka la hukum ban pynlong da ka jingtohkit halor ka jingkynnoh pyrshah ia ka jingpyniaid kam ba bakla hapoh ka skulbah NEHU da u Vice Chancellor.

Ka University ka la don hapdeng ka jingkhang dam namar ka jingiakhih jong ki samla pule ba la ialam da ka North Eastern Hill University Students’ Union (NEHUSU) bad ba la kyrshan da ka Khasi Students’ Union (KSU-NEHU Unit) kaba la neh mynta 11 sngi ban dawa hiar shuki mardor ia u VC kumjuh ia u Registrar bad u Deputy registrar.

Ha ka step ka 15 tarik Naiwieng na ka liang u Myntri Rangbah ka Jylla u Conrad K Sangma u la leit ban iakynduh ia ki samla pule kiba pynlong jingiakhih ha ka phyllaw jong ka skulbah.

“Ki la mih shibun ki jingiakren halor kane ka kam. Ngin sa iakren hadien,” ong u Conrad haba kren sha ki lad pathai khubor haba kylli halor kane ka jingwan iakynduh ka jong u ia ki samla pule ba pynlong jingiakhih bad halor ka jinglong jingman hapoh ka skulbah NEHU.

Lah ban kdew ba ka Ministry of Education ha ka 14 tarik u Naiwieng ka la ong,”Namar ka jingkhia halor ki mat ba la kdew naneng, la thaw ia ka Committee kaba kynthup ia ki arngut ki dkhot ki ban pynlong ia ka jingtohkit kaba bniah halor kane ka phang. Kine ki dkhot ki kynthup ia u Prof DP Singh uba dei u Chairman barim ka UGC kum u Chairman ka Committee bad u Prof Dilip Chandra Nath Vice Chancellor barim ka Assam University.

La bthah ia kane ka Committee ba kan pynlong ka jingtohkit halor ki jingkynnoh pyrshah ia u Vice Chancellor ka NEHU bad ban aiti ia ka kaiphod hapoh jong ka 15 sngi naduh ka tarik ba la pynmih ia ka hukum ha ryngkat ki jingai jingmut kiba donkam na ka bynta ban pynbeit ia kine ki jingeh hapoh ka skulbah.