Shim smai u Vijayashankar kum u Lat bathymmai ka Meghalaya; pynpaw ba u tip halor ka ILP

Syllad | The Rising MeghalayaJuly 30, 2024

U Chandrashekhar H Vijayashankar haka 30 tarik Naitung ula shah pyntian smai kum u Lat bathymmai ka Meghalaya ha u Chief Justice ka Meghalaya High Court u Justice S Vaidyanathan ha ka jingialang kaba la long ha Raj Bhavan, Shillong.

Ha kane ka jingialang la ia donlang ruh u Myntri Rangbah ka jylla u Conrad K Sangma, ki Symbud Myntri Rangbah ka Jylla u Bah Prestone Tynsong bad Bah Sniawbhalang Dhar, ki Myntri Sorkar, ki MLA, ki heh ophisar sorkar, ki heh shipai bad kiwei kiwei.

U Chandrashekhar ula wan shimti kum u Lat bathymmai ha ka Jylla ha ka jaka jong u Lat barim barim u Phagu Chauhan.

Haba kren sha ki lad pathai khubor hadien ba la shimti ia ka kam, u Vijayashankar u la ong, “Ka long da shisha ka kabu kaba khraw ban ioh ban shakri ia ka Meghalaya kum u Lat. Nga la shakri kum u MLA, MP bad Myntri sorkar, hynrei kane ka kam kum u Lat ka long da shisha ka jingbahkhlieh kaba khraw.”

U la pyrto ruh ia ki nongshong shnong ka Meghalaya halor ka jingshim ia ka jingkhuid kum ka thong kaba hakhmat eh bad pynpaw ruh ba ka dei ka jylla kaba shongsuk bad ka bym don satia kano kano ka jinghuri hura. U la ong ruh ba um don satia ia kino kino ki mat kiba iadei shimet hynrei ban trei na ka bynta ka roi ka par jong kane ka jylla.

Nalor kata une u Lat bathymmai u la pynpaw ruh ba u kwah ba ki nongshong shnong ka Jylla kin kynmaw ia u kum uwei na ki Lat uba shida bad uba angnud na ka bynta ban kyntiew ia ka roi ka par jong ka jylla.

Haba pynpaw ia ka jingsngewkmen ba ka sorkar NDA ka la ialam ia ka sorkar ha Meghalaya, u Vijayashankar u la ong “Kawei kaba Nga kwah ban ong haphi ka long ba Nga sngew sarong ban ong hangne ba haba Nga rung ha Parliament kum u dkhot, u (Late) Purno A Sangma u la long u Lamphang ha kata ka por bad mynta u khun jong u, u Conrad K Sangma u dei u Myntri Rangbah ka Jylla.”

Halor ka jingkylli la un iakren bad ka sorkar Pdeng na ka bynta ban pyntreikam mardor ia ka Inner Line Permit (ILP) kaba dei ka jingdawa kaba la slem ban lah ban tehlakam ia ka jingwan rung kyrthep ki briew kiba na bar, u Lat u la ong, “Na ka bynta ka jingtip jong phi, Nga pyntip sha phi ba Nga ruh Nga dei na kum kita ki nongshong shnong kiba phi pynpaw mynta, Nga tip ia ki mat jong ki trai shnong hangne. La slem bah Nga la wan sha Meghalaya ha ka por ba Nga dang don hapoh ka parliamentary standing committee ka tnad Railway kum u dkhot jong ka Parliament. Haduh arsien nga la wan jngoh sha Meghalaya, bunsien nga la wan sha kane ka jaka, hynrei kum u heh sorkar Ngam pat ju kren sha ki lad pathai khubor. Kane ka dei ka sien kaba nyngkong ba nga la ioh ban kren hangne ka jaka. Nga tip ia ki mat kiba iadei bad ka thain bad ia baroh kine ki mat ngan pynleit jingmut bha bad ngin ia pyrshang ban pynioh ia ka hok na ka bynta jong ki.”