Shim u Dy CM ia ka jingpynpaw ka HNLC kum ka drama; bteng khot iakren ia ki nongialam

Syllad | The Rising MeghalayaFebruary 14, 2024

U Symbud Myntri Rangbah ka Jylla uba khmih ia ka Tnat kam pohiing, u Bah Prestone Tynsong u la shim ia ka jingpynpaw ba dang shen jong ka Seng Hynniewtrep National Liberation Council (HNLC) lyngba ki rynsan social media kum ka drama, kata da kaba pynpaw ba na ka liang ka sorkar ka dang iai bteng ban khot ia ki nongialam jong ka sha ka jingiakren.

Haba kren sha ki lad pathai khubor, u Bah Tynsong u la ong; “Ngi dang iai bteng ban khot ia ki (HNLC) bad ba kin sngewbha ban ym weng noh na ka jingiakren iasuk.”

U la ong ruh, “Sa shisien Nga kyrpad ban bteng pat ia ka jingiakren, ka jingkhang ka dang plie. Pyrkhat sani biang halor kane, sngewbha long rangbah bad pyrkhat ha kaba iadei bad ka lawei.”

U Symbud Myntri u la ong ruh; “Kumba Nga la pynshai kham hashwa, sa shisien pat Ngan pynshai bad lada phi (HNLC) tieng, kata da kaba pynpaw ba ki nongialam ba halor kaba kynthup ia u Chairman ne commander in chief ki lah ban ym don mon ban wan namar ka jingsheptieng ioh kin shah kem, halor kane ruh ngi la dep ban ai ka jing pynthikna ba ngi plie ia ka lynti kaba laitluid, kata lada phi kwah ban iakren sha ka jaka shabar ka jylla Meghalaya, kata ruh ngi long lakloi, kata ki lah ban tyrwa ia ka jaka.”

Hynrei u la ong pat, “Haba Nga pynpaw ia kane kam dei satia ia ki ba kin thoh ha ki social media ba ngi khot ia u Bah Prestone na ka bynta ka jingiakren namar ia kane yn ym lah ban shim kum ka rukom kaba dei ne official. Ha ka jingshisha ym dei u Bah Prestone uba khot ia ki, hynrei dei ka sorkar India bad ka sorkar Jylla kiba khot ia ka jingiakren bad ka HNLC.”