Shim u ma Madonbai Rymbai, CEM barim ka JHADC iaka lyngkor ban pynkhie im biang iaka Congress ha Jowai

Syllad | The Rising MeghalayaJanuary 11, 2025

Hadien 6 snem ba u ma Madonbai Rymbai CEM barim ka JHADC bad u nongialam barim ula wan phai biang sha ka seng Congress, ula shim iaka lyngkor ban pynkhie biang iaka seng congress ha Jowai, kaba bun na ki paid nongkyrshan jong ka, kila sakma namar ka jingbymdon iaki nongialam ban kit ban bah iaka kam.

Kane kala wan jia long hadien ba ki heh nongialam ka Congress kila pdiang ia u ban long kum u kyrtong MDC sha ka Jaintia Hills Autonomous District Council ban aireng na ka thain 4 Amwi-Khliehtyrshi. Ka Elekshon sha ka ar tylli ki ADC kata ka KHADC bad JHADC kan long haka 21 tarik Rymphang.

Kumta u ma Madonbai ban pynlang pynlum iaki nongkyrshan ka party congress jong ka 2 Jowai Block Congress Committee bad la jied ia u kum u president nalor u kyrtong ka Mukhla Ummulong u Bitos Sari kum u vice president. Ia ka kam general secretary la jied ia u Teiwanza Challam, Assistant Secretary u Embhamiki Langbang bad Treasurer u Esterwis Ryngkhlem nalor kiwei kiwei ki dkhot na kylleng ki unit bad la pdiang bad pynskhem ia kine ki nongialam da ka MPCC haka 8 tarik Kyllalyngkot.

Haba kren bad ki nongthoh khubor haka 10 tarik Kyllalyngkot iaka jingdonlang u MDC ba mynta bad kyrtong na Jowai South Saron Pasweth; u Ma Madonbai Rymbai ula ong hadien 6 snem ba ula shong bishar iaka jinglong jingman ka sain pyrthei ula rai ban wanphai biang sha ka Congress ban shim ia kane ka lyngkor ban pynkhie im iaka party ban pynlum pynlang iaki nongkyrshan kiba la sakma bad saphred kylleng namar ka jingbym don ki nongialam.

Ula ong ba ka Jowai ka dei ka constituency kaba don burom kiba ki paid nongshong shnong kila ai ka jingkyrshan kaba pura iaka Congress ha ki bun bun snem bad wat haka elekshon MP kaba dangshen la sakhi ba ki paidbah ai ka muhor ksiar jong ki sha ka party, kaba pyni shai ba ka seng ka donkam iaki nongialam ban btin lynti ia ki paidbah.

Kane ka jingialang kaba long mynta ka sngi (10 tarik Kyllalyngkot) ka long ban pynlang iaki nongkitkam bad khot iaka jingiatreilang ban pynwandur iaka rukom treikam bad ban lum lang ia u paid nongkyrshan.

Kum u kyrtong ban aireng haka elekshon; “Ka Congress mynta ka kynti ka don iaka jingkyrmen ba kan jop la kumno kumno 15-16 seat na JHADC, bad ka daw ka long ba ki paidbah nongkyrshan kila ngiah iaka NPP kaba ym la satia ban pyniaid beit iaka synshar khaddar kaba la ktah iaki nongtrei ka konsil bad duh tulop la palat shisnem,” la ong u ma Madon bad bynrap “Kane ka jingjia long namar ba lait rud ka khajna shabar ka pla tyngka.”

Ula kynthoh ruh iaka jingai wai ka JHADC iaka forest beat house ha Mookyndur bad Ratacherra kaba ktah iaka iarong pisa ka konsil bad ong ba ha ka jingshisha kine ki khyrdop jong ka forest dei ban peit ban tem iaka jinglait ka khajna na ka ki mar khlaw bad pohkhyndew, pynban la ai wai ka ban ktah jur iaka konsil.

Kumta lada ka congress ka wan haka bor kan pynbha iaka rukom synshar khadar bad ban iakhun ban khang lad iaka jinglait rud ka khajna bad ban thaw ki lad ban pynjem iaka jinghiran ka pla pisa ka konsil.