Shimbynta shitrhem ki riewngeit ka Balang Katholik haka Iukharist Proseshon ka Jowai Diocese

Syllad | The Rising MeghalayaDecember 8, 2019

JOWAI: Da ki hajar ngut ki riew ngeit ka Balang Katholik jong ka Jylla Niam Jowai kila ïashimbynta shitrhem haka jingiaseng Iukharist Proseshon kaba long ha Jowai Parish haka Sngi U Blei.

Ha kane  ka proseshon Iukharist, ki paid riewngeit Katholik na kylleng ka Jowai Diocese ki shim bynta ha ka Mass Bakhuid ba la ialam  da u Most Rev. Bishop Victor Lyngdoh ha ka  jingiasynran lang ki lyngdoh Sohblei baroh ka Jylla Niam Jowai.

La skhi ruh da ki spah ngut ki khynnah ki khynnah kynthei bad shynrang kiba pdiang ïaka Communion Bakhuid haka sien ba nyngkong eh kila shimbynta shitrhem.

U Most Rev. Bishop Victor Lyngdoh jong ka Jylla Niam Jowai  haba sam ïaka khubor ula ong ka Iukharist Bakhuid kadei ka lad jong ka jingpynim kaba aibor iaka met bad mynsiem jong u paid riewngeit bad ka wanrah ia kiba bun ki kam phylla haka jingim briew. Ula ong ruh ba uno uno uba ieid ïaka Iukharist u kiar na ka pop ka sang, ka klim ka khalai ka dih buaid bad kiwei kiwei ki kam kiba pynsngewsih ïa U Blei bad iaki para briew.

U Bishop ula kyntu ïaki riewngeit ka Balang Katholik ban ieid ïa U Blei bad ban iied ïaki para briew bad ki marjan bad ban bud ruh ïaki hukum U Blei.

Haka nohphaisngi ki riew ngeit ka Balang Katholik ïashim bynta haka jingïaid proseshon kaba la sdang na Marian Hill, Iawmusiang, Tpep Pale bad mih sha Mission Compound, Iawmusiang bad la pynkut ha Madan Marian.

Ka Iukharist Proseshon jong u snem 2020 kan long ha Khahnar, East Jaintia Hills.