Shimkhia ka NSS Unit Jaintia Eastern College ban pynkylla dur iaka shnong kaba jied kyrpang

Syllad | The Rising MeghalayaOctober 12, 2022

Ki volunteer jong ka National Service Scheme (NSS) Unit jong ka Jaintia Eastern College (JEC) kila pynlong iaka special camp kaba shitaiew lynter haka shnong Narwan, ka shnong bala jied kyrpang (Adopted Village) ka NSS ban wanrah iaka jingkylla haka imlang ka sahlang naduh ka khuid ka suba, ka koit ka khiah bad ka lad iohkam iohjam.

Ki volunteer ka NSS Unit Jaintia Eastern College kila sah ha katei ka shnong naduh 2 tarik haduh 8 tarik une u bnai Risaw 2022.

Naduh ka sngi kaba sdang ia kane ka camp, kata haka 2 tarik la pynlong iaka prokram ban jurip ia ki bynta jong ka shnong na ka bynta ban pyntreikam ia ki kam hapoh ka taiew. Ha ka por janmiet pat ki volunteer ki la leit jngoh ia ki rympei iing (home survey visit) jong ki nongshong shnong ban iakren bad kylli jingkylli ia ki khnang ban tip kham bniah ia ki jingeh bad jingdonkam jong ki kum ki nongshong shnong.

Haka sngi kaba bud, haka 3 tarik, ka Unit ka la pynkhuid pynsuba ia ki rud ki kiar jong ka skul shnong, kata ka Narwan Secondary School. La kyrshut pynkhuid ia ki soppailen nangta la pynthaba ia ki kynroh da kaba pushara shun. Shuh shuh, ka Unit ka la ioh ban pynthaba ia ki painkhana skul, ka iingshet ja jong ka skul bad kiwei pat ki bynta.

La pynkhuid iaka Community Hall bad kumjuh ruh ia ka madan kynjatbol bad kumjuh ban pynkhuid bad pushara lieh ia ki pung umbam umdih, umsait um khlieng jong ka shnong. La pynkhuid sa ia kiwei pat ki bynta jong ka shnong, kaba kynthup ia ka jingai rong lieh ia ki sohpet sorkar (speed breaker) pushara ia ki mawkynroh rel, leit jurip ia ki rympei iing, bad kiwei kiwei haka 4 bad 5 tarik u bnai Risaw.

Ha ka 6 tarik, ka Unit ka la pynlong ia ka prokram ai jingtip (awareness) halor kiba bun ki phang. Ka Kong M. Pala, Health worker ka Narwan Sub-centre kum ka Resource Person kala ai jingkren halor ka phang ‘Food & Nutrition’.

Ka Kong Pala kala hikai iaki nongshong shnong ban bam ia ki jingbam kiba tei ia ka met khnang ban ioh ia ka met ka phad kaba koit ba khiah.

Nalor M Pala, ka Kong R Pala, CHO Sub-Centre Sutnga bad Counsellor MACS kala kren halor ka jingpang ‘HIV bad AIDS’. Kum ka riewshemphang kala iathuh ia ka jingshyrkhei jong kane ka jait jingpang. Nangta kum ka jingiada, Kala kyntu ia ki nongshong shnong phah test shuwa wat hashuwa ban iapoi kha poi man ruh. Shuh shuh na ka bynta kino kino kiba ioh ia une u khniang jingpang kala kyntu ba kim dei ban lehrain hynrei ban mih shakhmat ban leit iathuh ha ki doktor na ka bynta ban ioh ia ka jingsumar. Ha kaba pynkut, kala sneng kraw ban long kiba adkar ha ka jingim ban lait na ki jingeh hadien.  

Hadien kane kane, la ioh sa ka jingkren na u Dr. Ferrando Lyngdoh Nonglait u nonghikai jong ka Jaintia Eastern College halor ka phang ‘Problems and challenges of rural students in higher education in Meghalaya’. Kum u riewshemphang ula iathuh bun tylli ki jait jingeh bad ki daw ba ki khynnah pule nongkyndong ki iakynduh. Ula ban jur iaki kmie ki kpa kiba don ha kane ka prokram ba kin kham ai ia ka por jong ki ban tip bad ban iasyllok bad la ki khun halor ki jingeh jong ki, kumjuh ruh ula kyntu ia ki khun samla ba kin pyrkhat khia na ka bynta ki kmie ki kpa, hooid ruh ban trei shitom khnang ba kin suk hi ha ka jingim khamtam ha kane ka juk kaba jwat mynta. Hadien kane kala don ka jingiathir jingmut halor ka jingeh ki samla pule ha nongkyndong.

Haba bteng shuh shuh iaka jingai jinghikai haka 7 tarik, kala don ka jingai jinghikai halor ka mariang bad ka kam jngohkai pyrthei.

U Dr. P Nongtdu, M.Sc, Ph.D Principal, Jaintia Eastern College kum u riewshemphang ula kren halor ‘Environment, Tourism bad ka jingdap 50 snem ka jylla Meghalaya”. Ha ka jingkren jong u ula banjur ban tyngkai iaka jingbuh jingsat ka mariang.

Ha kaba iadei bad ka tourism, ula ong ka shnong Narwan  ka la don lypa kyrhai ka jingai jong U Blei kum ka nam jong u sohniamtra Narwan, ki sawdong sawkun hapoh ka shnong kiba itynnad bad ithiang. Ula ruh ba ka shnong kadei ban pynneh pynsah iaka deiriti, kaba ki nongwan jngohkai ki kwah ban ioh jingtip bad ban long ruh ki briew kiba don iaka mynsiem kaba jynsur ka jingmut jingpyrkhat bad ban pdiang sngewbha iaki nongjngoh mariang la ki dei na kano kano ka jaka ne jylla ruh.

Ula iathuh halor ka jingiaid lynti ka jylla, naduh ba ka dang hap hapoh ka Assam haduh ba kala kynjoh ia u mawmer ba 50 snem ka jingioh jylla ba pura.

U Assistant Professor B. Papang, HOD Commerce Department, Jaintia Eastern College u la ai jingkren halor ka mat ‘Tourism bad Entrepreneurship’ ne ka kam jngohkai bad ka lad sengkam sengjam ki khun samla ban ieng hala ki jong ki kjat.

U Ma Lamsuk Langstang, Waheh Chnong Narwan ula kyntu iaki nongshong shnong jong ka shnong Narwan ba kin pyndonkam hok iaki jinghikai kiba kila ioh khnang ban pynmtoi ialade shimet bad kumjuh iaka imlang ka sahlang. U Programme Officer jong ka NSS Unit, u Assistant Professor Jamphrang Lyngdoh ula pyniaid ia kane ka jinghikai.

Haba pynkut ia kane ka special camp ha ka 8 tarik la pynlong iaka trekking ne jingiaid kjat. Ha kane ka sngi ki samla pule ryngkat bad ki nongshong shnong ki la mih dang step ban leit jngoh ia ki jaka jngoh mariang kiba itynnat kiba don hapoh u pud u sam jong ka shnong Narwan, kum ki jaka peit shynna, ki wah, ki kshaid, ki bri soh, bri slasha bad kiwei pat.

Ka thong jong kane ka prokram ka long ban pynpaw pyrthei ia ka jingitynnat ka mariang hapoh u pud u sam jong ka shnong Narwan bad kumjuh ruh ban kyntiew ia ka kam jngoh mariang kaba kiba bun kim pat tip ia ka.

Ha kane ka special camp don baroh 50 ngut ki volunteer jong ka NSS Unit kiba kynthup ia ki shynrang bad kynthei lem bad 2 ngut ki nonghikai ka college.

Na ka bynta kane ka special camp, ka Unit ka pynpaw ka jingsngewnguh kyrpang ia u Principal jong ka Jaintia Eastern College, u Waheh Chnong ka shnong Narwan ryngkat lang ia ki nongshong shnong bad kyrpang eh ruh ia ka NSS Cell, NEHU, Shillong kaba long ka kmie jong ki NSS unit hapoh ka jylla kaba la btin lynti ia ka unit ha kiba bun ki liang.

Ka shnong Narwan ka dei ka adopted village jong ka NSS Unit Jaintia Eastern College, Khliehriat na ka bynta 5 snem, kata naduh u snem 2022 haduh 2026.