Shimkhia ka sorkar Jylla ban pynduna ia ka jingdon kiba pep skul shiteng por

Syllad | The Rising MeghalayaJuly 17, 2024

U Myntri ka Tnad Pule Puthi Rakkam A Sangma u la ong ba na ka liang ka sorkar Jylla ka la shim ia ki lad ki lynti ban pynduna ha kaba iadei bad ka jingdon jong ki khynnah kiba pep skul tang shiteng por.

Haba kren sha ki lad pathai khubor, u Sangma u la ong, “U Myntri Rangbah ka Jylla u la bishar bniah ia ka jinglong jingman ha ka pule puthi ha ka jylla ha ka taiew ba la dep bad ngi la shim ia baroh ki lad ki lynti ban kyntiew ia ka kyrdan pule ha ka jylla.”

Katkum ka Unified Digital Information on School Education (UDISE) plus data 2021-22, ka Jylla Meghalaya ka dei ka jylla kaba bun eh ki khynnah kiba pep skul ha baroh ki kyrdan.

U Sangma u la ong ba ka sorkar jylla ka la shim shibun ki sienjam bad ki lad jingiarap ha kaba iadei bad ka jingpynkylla ia ki kot pule skul, ka jingshna bad pynthymmai ia ki iing skul ha kylleng ka jylla nalor kiwei pat ki lad ki lynti.

U la ong ba ka jingpep skul ka long kaba jur bha ha baroh ki district jong ka thain Garo Hills. U la ong ba ka jingpass ha ka SSLC ka long tang 37% ha kine ki san snem ba la dep.

“Ka dei ka mat kaba sngewkhia shibun na ka bynta jong ngi.Mynta ngi la ithuh ia ki 2-3 tylli ki district kiba kham hiar arsut bad kumta ngi la shim ia baroh ki sienjam ban kyntiew ia ka jinglah ka jong ki, ban lehbha” u la ong.

Ha kajuh ka por, u Myntri  u la pyntip ruh ba dang shen ka la don ka jingialang bad ki heh jong ka Meghalaya Board of School Education (MBOSE) na ka bynta ban pynrung ia ki kot pule kiba don ia u QR Code.

“Ngi kwah ban pynrung ia ki kot pule kiba don ia u QR Code ha kaba man la ka phang yn hikai lyngba ka video. Lada ki khynnah kim lah ban pule bha ha ki klas, ki leit phai noh sha iinng bad ha ka jaka ba kin leit tuition kin leit sngap sha la iing, kin ioh jinghikai na ka video ha man kawei pa kawei ka phang,” u la ong

Shuh shuh u la ong ruh, “Ngin sa don ia ki jingkylli ba la pynbeit 10-15 snem jong ka MBOSE, ICSE, CBSE, JEE NEET – kumta ha kata ka rukom, kan long ka jingiarap ia ki samla pule jong ngi.”