Shimkhia ka sorkar MDA II yn sdang biang ban tei Iawmusiang, nalor ki surok ba kynjoh 50 klur ha Jowai

Syllad | The Rising MeghalayaDecember 13, 2024

U Symbud Myntri Rangbah ka Jylla u Bah Sniawbhalang Dhar ha ryngkat u MLA ka Jowai u Bah Wailadmiki Shylla ha ka 13 tarik Nohprah ki la buh mawnongrim ban bteng ka jingtei ia ka Iawmusiang kaba la sahteng mynta la bun tylli ki snem bad ruh ban shna ia ki lynti surok hapoh Jowai constituency kaba la kynjoh T. 50 klur.

Ha ka jingkren u Dy CM ula pyntip ba ka Sorkar MDA ka la rai ban bteng ka jingpyntrei ia ka Iawmusiang Complex ha ka jinglut ka ban kot baroh T.25.6 klur bad la khmih lynti ba yn lah ban pyndep noh hapoh ka 24 bnai. U la ong ruh ba la dei ban pyndep ia kane ka jingtei hapoh u 2021, hynrei namar ki mukotduma kumta ka kam ka la sahteng noh.

Ki surok kiba la buh mawnongrim ban shna ban pyniasoh iaka Jowai Constituency ki kynthup iaka Surok Jowai Intermediary Road (3.2 km), Ialong (11.8 km), Salaroh (4.225 km), Litang (2.8 km), Madur Thymme (6.4 km), Niriang (2.5 km) bad Mukhla (2.5 km) 7.5 km) nalor ka jingshna ia ka surok LNKT 15.1 KM hapoh ka PMGSY (T.29 klur), ka surok Jongksha-Kharang kaba pyniasoh ia ka Niriang-Nongjrong (6.5 km) ha ka jinglut kaba la antad ba kan long T.7 klur bad ka surok Sabahmuswang hapoh jong ka RIDF (T.3 klur).

Hadien ka jingialang, u Bah Sniawbhalang Dhar u la plie paidbah ia ka Annexe Building jong ka Jowai Circuit House ha Loomsooiung, Newhill, kaba la tei da ka jinglut kaba Rs 2.14 klur.

Haba pynpaw halor ka jingeh kaba iadei bad ka jingpynkhuid ia ki jaboh jabain kaba la wanrah jingeh ia ki paidbah ha sor Jowai, u Bah Dhar u la ong ba wat hadien ba ka sorkar bad ka Jowai Municipal Board ki la pyrshang bun bunsien, hynrei ym shym la lah ban pynurlong ia kane ka project namar ka jingpyrshah na ki katto katne kiba pyrkhat ia ki kam myntoi shimet, bad bynrap ruh ba, “Ka politik ka dei na ka bynta shisien san snem ym baroh ki 1,825 sngi kumta to ngin sangeh noh bad pynleit jingmut ha kaba phaikhmat sha ka khuid ka suba bad ka jingpynjyrngam pat ia ka mei mariang.”

Haba pynpaw ia ka thong jong ka Jylla ban kynjoh sha ka ioh ka kot ka ban kynjoh sha ka $10 billion, u Myntri u la iai ban jur halor ka jingdonkam ban kyntiew ia ka kam jngohkai ha ka thain Rilum Jaintia. U la ong ruh ba dei tang ka Meghalaya napdeng ki Jylla ka thain Shatei Lammihngi kaba la ioh ia ka jingithuh na ka Sorkar Pdeng halor ka jingpyntreikam pusa ia ka song jingiarap pisa ba ioh na ka External Aided Project (EAP).

Katba u MLA ka Jowai uba dei ruh u Chairman ka MUDA u Bah Wailadmiki Shylla u la ong ba ka jingsahteng ha ka jingtei ia ka Iawmusiang ka la wanrah ka jingbynniaw bad pynijli ym tang ha sor Jowai hynrei ia ka Rilum Jaintia baroh kawei bad dei hadien kiba bun tylli ki jingialang bad u Myntri Rangbah ka Jylla, Symbud Myntri Rangbah bad ka PWD bad ka jingbteng ban tei biang ia kane ka Iew kan sa sdang biang.

Nalor kata u pyntip ba ka Sorkar kan sa sdang ban shna ia ka Nursing College ha West Jaintia Hills ha kine ki khyndiat bnai ban wan bad kan kylla long ruh ka lad ban aikam ai jam sha ki samla jong ka thain.

U la pyntip ruh ba ka Meghalaya Games 2025 kan long ha u bnai Kyllalyngkot 2025 bad ka jingwan jong kane lympung ialehkai kan kyntiew shibun ia ka thain Jaintia namar kin don shibun ki kam pynroi kum ki jingtei, ki madan ialehkai tennis, ki pung jngi, ki jaka ialehkai boxing, ki madan phutbol bad ki jaka ialehkai wrestling nalor ka jingshna pynbha ia ki surok, ki college, skul, jingpynpoi um lyngba ka jingbei tyngka kaba kot palat T.30 klur.

U MLA u khot ruh ia ki nongshong shnong ka sor Jowai ba kin ai ka jingiatreilang na ka bynta ban ioh ia ka lad kaba neh ha kaba iadei bad ka khuid ka suba kaba neh khamtam hapoh sor Jowai.

Kiwei pat kiba la aijingkren ha kane ka sngi ki kynthup ia u Chief Executive Member (CEM) JHADC u Ma Thombor Shiwat, Secretary ka Tnad PWD Roads & Building, Bah BW Phira, Chief Engineer PWD Building James Lakiang, Executive Engineer PWD Buildings Jowai Division M Nongpluh, Executive Engineer PWD Roads South Jowai Division RD Pakayntein bad Superintendent Engineer PWD Roads Jowai Circle u Bah M Kharnaior nalor kiwei pat.