Shimti biang ka tnad tourism ia ka Nan Polok, T.18 klur mang ban tei ia ki jingpynbyrngia

Syllad | The Rising MeghalayaApril 10, 2025

Ia ka jaka iaidkai pyngngad ba pawkhmat bad ba la rim ka nongbah Shillong, ka Nan Polok (Ward’s Lake) shen yn sa shimti biang da ka tnad Tourism, kaba la mang haduh T.18 klur ban shna ia ki jingtei ki ban khring bad pynbyrngia ia ki nongwan shangkai sha ka nongbah Shillong.        

U Myntri ka Tnad Tourism u Bah Paul Lyngdoh haba pyntip ia kane ha ka 10 tarik Iaiong u la ong, “Ngi la iaid shakhmat ha kaba iadei bad ka jingpynphai biang ia ka Nan Polok kaba khmih mynta da ka Tnad Forest & Environment. Ka Nan Polok kumba phi tip, wat ka jingkieng kaba pawkhmat bad kaba kaba khring ia ki nongwan shangkai ka dei kaba ju don bad ka Tnad Tourism, hynrei namar ki katto katne ki daw la shimti bad khmih da ka Tnad Forest.”              

“Hynrei, mynta ngi la shim ia ka rai ha ka jingialang bad la pyniaid da u Myntri Rangbah ba yn pynphai biang sha ka Tnad Tourism. Katba ngi dang iakren, ngi la dep ruh ban mang ia ka song pisa kaba haduh T.18 klur na ka bynta ban pynitynnad shuh shuh ia kane ka Nan kynthup ia ka jingshna ia ki jingtei kum ki cafe, ki sound & light show bad kiwei kiwei,” u la bynrap.                

Nalor kata u la pynbna ruh ba ka por ban khang ia ka Nan Polok yn pynjlan na ka 5 baje janmiet sha ka 10 baje mynmiet.                

“Hadien ba ngi la shimti pura ia kane ka nan, ngin sa pynthikna nyngkong eh ban pynkylla noh ia ka por, kata ka por ban khang kan ym long shuh 5 baje janmiet, hynrei kan long haduh 10 baje mynmiet bad kan long ruh ka jaka kaban khring ia ki nongiaidkai pyngngad ha ryngkat ki jingpynbyrngia na ka bynta kiba wan shangkai sha kane ka Nongbah Shillong kiba ju ud halor ka jingbym don ki jingpynbyrngia ha ki por janmiet,” ong u Bah Paul.       

Haba kylli u Bah Paul u la ong, “Ngin pynlong ruh ia ki tamasa, ngin sa iohi ia kiei kiei ia kiba ki sorbah ba pawkhmat ki la lah ban leh. Ngin kyntiew ia kiba bun rukom ki jingpynbyrngia hapoh kane ka Nan.”