Shimti ka Kong Idashisha Nongrang kum ka DGP bathymmai; ka thong ba kongsan ban pynneh ia ka shongsuk

Syllad | The Rising MeghalayaMay 21, 2024

Ka heh ophisar IPS ka Kong Idashisha Nongrang ka la shimti kum ka Director General of Police (DGP) bathymmai ka Meghalaya ha ka 20 tarik Jymmang da kaba pynpaw ruh ia ki thong kiba hakhmat eh ki jong ka.

Haba kren sha ki lad pathai khubor, ka Kong Nongrang ka dei ruh ka kynthei ba nyngkong eh na ki Ophisar IPS ka ban shimti ia kane ka kam kaba hakhliehduh ka Tnat pulit ka la ong, “Ngam tharai ba ka jinglong DGP ka kynthei kadei ka jingdon ia ka kyndon ne kyrdan hynrei  kum ka ophisar kynthei bad kum ka longkmie, nga sngew ba ki kynthei ki don ia la ka jong ka bynta kaba pher  bad ngan pyndonkam ia ka ban pynthikna ba ki kynthei kin sngewshngain kumjuh ban pynneh ia ka shongsuk shongsain bad ban pyniajan ha ka jingiadei hapdeng ki pulit bad ki paidbah.

Halor ka jingkynrei jong ki kam bymman, ka la ong, “Wat hadien ki jingpyrshang borbah ha kine ki snem kiba la leit noh, hynrei ki kam bymman kin shym la hiar, hynrei ki la nangkiew pynban..bad ngim shym la lah ban poi sha ka thong kumba ngi kyrmen. Kumta Nga sngew ba ngi dei ban phaidien biang halor kumno ba ngin shim ia ki sienjam bad lehse ban pyrkhat thymmai halor ki lad ki lynti ban tehlakam ha kaba iadei bad kane ka bynta.”

Ka Kong Nongrang ka la pynpaw ruh halor ka jingdonkam ban pynkhlain ia ka jingtreikam jong ka tnat syntiat namar khlem kane ka tnat yn ym lah ban pyndep ia ki kamram kiba dei ban kynjoh sha ka thong.

Ka la ong ruh ba ka nongbah Shillong kaba dei tang ka jaka rung na ka bynta ki kam khaii drok hynrei mynta ka la kylla long ka nongpyndonkam, bad wat hadien ki jingioh kurup kiba khlem sangeh hynrei ka tnat pulit kam shym la lah ban pynkut ia ki kam khaii drok. Ka tnat Anti Narcotic Task Force (ANTF) ka la trei borbah ha kiba buntylli ki case hynrei kam shym la don satia kano kano ka jingkylla, ka la ong.

Nalor kata ka la pynpaw ruh halor ka jingdonkam ia ki longiing longsem bad ka imlang ka sahlang ba kin iasnohkti lang ha ka jingiakhun pyrshah ia ka jingshyrkhei jong u drok.

Haba kylli ha kaba iadei bad ki kam khaii dewiong beain, kane ka DGP bathymmai ka Jylla kala ong ba ki don shibun ki jingbthah na ka liang ka sorkar bad ki don ruh ki jingbthah na ka liang ka iingbishar katba na ka liang ki bor pulit ki la iai pyrshang ban tehlakam ia kiba kum kine ki kam beain.

Ha kaba iadei bad ka jingshim rai jong ka kynhun kieng atiar Hynniewtrep National Liberation Council (HNLC) ban mih noh na ka jingiakren iasuk, ka DGP ka la ong, “Ha kaba iadei bad ka jingiakren iasuk, ka dei ka jingshim rai jong ka sorkar kaba la kren shai ba ki iai plie ia ka lynti sha ka jingiakren iasuk.Hooid ngi lah iohi ruh ia ka jingiakren iasuk bad ka ANVC kaba la kut noh da ka jingiatehkular hapdeng ka sorkar pdeng, sorkar jylla bad ka ANVC. Ngi lah iohi ruh ia ka jingeh ha kaban pyntreikam ia katei ka jingiateh kular. Ngi lah shim kam ruh ia ka GNLA bad ngi la don ruh bun tylli ki jingiakren iasuk bad ka GNLC bad ki kynhun kiba rit. Kumta ha kaba iadei bad ka HNLC bad halor ka jingiakren iasuk nga tharai ka jingiakren kaba biang tam ka dei bad ka sorkar.”

Kumjuh halor ki kam dawa pisa jubor jong ka HNLC, ka Nongrang ka la ong, ki nongialam ka HNLC hi ki la pynshai ba kim donkti ha kane ka kam, bad ka jingtohkit bniah halor kane ka dang iai bteng la ki dei shisha ma ki ne kiwei pat kiba shim kabu ha ka kyrteng jong kane ka seng.

Ha kajuh ka por ka la iai ban ruh ba ka jingpynphai pat ia ki samla kiba shah ialam bakla sha ka lynti kaba dei kam dei satia tang ka kamram jong ki pulit. “Ka Tnat pulit ka la iatreilang ryngkat bad ki bor shnong lem bad kiwei pat ki kynhun hapoh ka imlang ka sahlang bad kumta ka dei ban long ka sienjam kaba kongsan na ka bynta ban pynthikna ba ki samla kin ym shah ialam bakla,” ong shuh shuh kane ka khliehduh ka tnat pulit.

Kane ka DGP bathymmai kaba dei ka Ophisar IPS jong u snem 1992 bad ka la wan bujli ha ka jaka jong  u Dr LR Bishnoi, uba la shongthait noh ha ka 19 tarik Jymmang, bad kan shakri ha kane kam na ka bynta ar snem kynthih.