Shimti u Bah Francis Kharshiing kum u Mission Director ka DREAM ban bteng ia ka thma drok

Syllad | The Rising MeghalayaNovember 12, 2024

U heh IPS barim u Bah Francis G Kharshiing ha ka 11 tarik u Naiwieng u la shimti kum u Mission Director bathymmai ka Drug Reduction Elimination & Action Mission (DREAM), bad ban jur halor ka jingdonkam ia ka jingiashim bynta lang da ki bor shnong ha ka jingiakhun pyrshah ia u drok ha ka Jylla.

Hadien ka jingiakynduh ia u Myntri ka Tnad Social Welfare u Bah Paul Lyngdoh ha ka ophis treikam jong u, na ka liang u Bah Kharshiing u la ong ba ka Sorkar Jylla ka don ia ka jingangnud ban iakhun pyrshah ia u drok lyngba ka DREAM khnang ban pynthikna ia ka Jylla Meghalaya kaba lait na u drok.

“Kane ka dei ka jingiakynduh kaba nyngkong ia u Myntri ba dei khmih bad ngi la iakren ia ki katto katne ki jingai jingmut halor kumno mynta ngin iaid shakhmat. Nga la pyntip sha u Myntri ba Nga la sdang treikam khlem ka kamra, ka shuki bad khlem ki nongtrei ki ban iarap lem, hynrei ngam khuslai ia kine kiei kiei, bad ngi la sdang pyniaid ia ki kam bad nga la khot ruh ia ka jingialang bad ki katto katne ki nongshong shnong kiba don ka jingkitkhlieh kaba kynthup ia ki Rangbah Shnong, Sengbhalang, ki samla pule ha ka 13 tarik u Naiwieng ha ka ophis ka Social Welfare,” u la ong.

“Kane ka mat ka dei kaba nga sngewtynnad shibun. Nga kwah ban iohi ba ka Jylla ka jong ngi kan lait na u drok, bad dei na kata ka daw ngi la pdiang ia kane ka kam. Ngan pyrshang ia kaba bha tam. Watla nga hap ban kren shai ia kane, ia u soh phi lah ban ym iohi ha ka shi sngi ne shi bnai ne shi snem, hynrei ngin sa sdang ban leh ei ei bad ngin pyrshang ia kaba bha tam ban pyniaid shakhmat ia ka project,” bynrap u bah Francis.