Shimti u Bah Prestone Tynsong kum u president bathymmai ka NPP ka jylla

Syllad | The Rising MeghalayaNovember 1, 2023

U National Vice President jong ka National People’s Party (NPP) uba dei ruh u Symbud Myntri Rangbah ka Jylla u Bah Prestone Tynsong haka sngi ba Ar  u la shah jied kum u president bathymmai jong ka party ha ka jylla.

U Bah Prestone u la shimti ia kane ka kam na ka jaka jong u MP Rajya Sabha u Dr WR Kharlukhi uba la bat kum u state president mynta lah 16 snem, kata hashwa ka jingpynlong ia ka Ilekshon shapoh Lok Sabha bad ki ilekshon sha ki Autonomous District Council (ADC).

La leh burom ia une u president bathymmai lyngba u national president ka NPP uba dei ruh u Myntri Rangbah ka jylla u Conrad K Sangma ha ka jingialang kaba la long hapoh ka ophis jong ka party ka jylla ha ka jingiadon lang ki nongialam bad ki nongtrei ka party.

Haba ai khublei ia u Bah Tynsong halor ka jingshimti ia kane ka kam bathymmai, u Conrad Sangma u la ong; “Nga kwah ban pyniasoh lang bad kiwei pat ki nongialam kiba la pynpaw ia ka jingkmen halor ka jingshah jied jong u Bah Prestone Tynsong kum u president bathymmai jong ka seng NPP ha Meghalaya.

“Nga la iatreilang ryngkat bad u ha kiba bun ki jinglong jingman bad ngi la ia mad lang ia shibun ki jingeh ha ki jingtreikam, ngi la ia san lang kum shiparalok bad ia sngewthuh jingmut lang bad iatreilang ban weng ia ki jingeh kum ka kynhun. Nga sngewkmen shibun mynta ka sngi ba u la pdiang ia kane ka jingkitkhlieh namar Nga tip ia ka jinglah ka jong u bad Nga tip ia ki jait kam kiba u lah ban leh bad Nga thikna ba ka jingshimti na kane ka kam ba la iehnoh da u Dr Kharlukhi yn lah ban pyniaid shakhmat ia ki jingtreikam jong ka party. Nga thikna ruh ba lyngba ki jingtreikam kiba naduh tynrai kiba u la pyndep mynta la bun bun phew tylli ki snem, kata kum ka kynhun lane ha ka liang ka sorkar baroh kine kin kylla long ka jingtreikam kaba khraw bad ka ban iarap ban nangpynkhlain shuh shuh ia ka party.Nga don ia ka jingshaniah kaba pura ba un lah ban ai ia kaba bha tam,” ong shuh shuh u Conrad Sangma.

Haba pan ia ka jingkyrshan lang jong baroh ki nongialam ka party, u Sangma u la ong; “Nga shu pan ia ka jingkyrshan jong baroh ki nongialam ka party, baroh ki phi ba ka jingdawa ne jingkyrpad ia u Bah Prestone Tynsong ban shimti ia kane ka kam ka la wan na phi, bad kam dei kaba Nga la jied.

Nalor kata une u khliehduh ka seng NPP u la kyntu ruh ia u Bah Tynsong ba un pynthymmai noh mardor ia ka  state level committee.

Ha ka jingkren lyngkot kum u president bathymmai u Bah Prestone u pynthikna ba shen yn sa pyndep ha kaba iadei bad ka jingpynthymmai ia ki jingtreikam jong ka party.

“Ngi donkam da shisha ban wanrah ka jingkylla bad Nga buh ruh ka jingkyrpad ia baroh ki dkhot ba la rim ha haba don kino kino ki kam ba la pynkhamti ngin ia trei shitom ryngkat lang,” ong u president bathymmai da kaba bynrap ruh ba u don ia ka thong ban pyndep noh ha kaba iadei bad ka jingtei ia ka ophis treikam ba pura jong ka party kloi katba lah.

Ha kajuh ka por u buh ruh ka jingkyntu ia ki nongialam bad ki nongtrei ka party ba kin trei shitom bad ban pynthikna ba ka party kan ioh ia ka jingjop ha kane ka Lok Sabha ilekshon ka ban long ha u snem u ban wan.